Համահայկական 6-րդ ամառային խաղերը թե մարզաձեւերի, թե մասնակիցների քանակով ռեկորդային է: Ու չնայած դրան՝ մրցումներն ընթանում են կազմակերպված, ինչը մրցավարական գլխավոր հանձնաժողովի եւ մրցումները սպասարկող մրցավարների պրոֆեսիոնալիզմի արդյունք է:
«Առավոտը» զրուցել է Խաղերի գլխավոր մրցավար, միջազգային կարգի մրցավար Դերենիկ Գաբրիելյանի հետ:
– Պարոն Գաբրիելյան: Դուք միջազգային ամենաբարձր մակարդակի մրցումներ սպասարկելու հսկայական փորձ ունեք: Բայց այլ բան է համալիր մրցումների մրցավարությունը կազմակերպելն ու իրականացնելը: Դժվար չէ՞:
Կարդացեք նաև
– Հեշտ չէ, բայց բոլոր 17 մարզաձեւերի սպասարկմանը ներգրավել ենք մեր բոլոր լավագույն մասնագետներին: Այս անգամ մրցումներն ընթանում էին ոչ միայն Երեւանում, այլեւ Գյումրիում, Վանաձորում, Արտաշատում, Աբովյանում եւ Ստեփանակերտում: Բնականաբար, դա լրացուցիչ ծանրաբեռնվածություն էր մրցավարական գլխավոր հանձնաժողովի համար: Պետք էր մշտական կապի մեջ լինել բոլորի հետ, հընթացս կարգավորել եւ լուծել առաջացող հարցերը: Օգտվելով առիթից՝ ուզում եմ շնորհակալություն հայտնել բոլոր այն մարդկանց ու կազմակերպություններին, որոնք տեղերում աջակցել են Համահայկական խաղերի բարձր մակարդակով անցկացմանը՝ մարզպետարաններին եւ քաղաքապետարաններին, ազգային ֆեդերացիաներին, սպորտի եւ երիտասարդության նախարարությանը, ՀԱՕԿ-ին, ՀԽՀԿ-ի բոլոր անդամներին, իմ գլխավորած գլխավոր մրցավարական հանձնաժողովի անդամներին, որոնք միասնական աշխատում են վաղ առավոտից մինչեւ ուշ գիշեր: Սա նաեւ համահայկական միասնականություն է:
– Մասնակիցներից եւ պատվիրակություններից դժգոհություններ կամ բողոքներ չե՞ն եղել:
– Առանց դրա աշխարհում ոչ մի մրցում չի լինում: Իհարկե, թեկուզ քիչ, եղել են, այն էլ՝ հիմնականում նախնական փուլերում, երբ մասնակից թիմերի պրոֆեսիոնալիզմը այն չէ: Եվ երբ մրցավարական հանձնաժողովում մանրամասն ուսումնասիրել ենք դրանք, պարզվել է, որ իրենք են սխալ մեկնաբանել կատարվածը, մրցավարները ճիշտ են գործել: Բոլոր դեպքերում մենք հրավիրում ենք հայտ ներկայացնողներին, բացատրում օրենքները, կարգը, իրականությունը եւ նրանք համոզվում են, որ մրցավարական կողմնակալություն կամ դիտավորություն չի եղել: Այս առումով Համահայկական խաղերի մասնակից բոլոր պատվիրակությունների ներկայացուցիչներին կհորդորեի՝ պարզապես գալուց առաջ ավելի խորն ուսումնասիրել կանոնադրությունը եւ օրենքները:
Խաղերն արդեն թեւակոխել են ավարտական փուլ: Ասպարեզում մնացել են բարձրակարգ թիմերը, որոնց պայքարն սպասարկելն էլ ավելի դժվար է ու ավելի պատասխանատու: Բայց վստահ եղեք, որ մրցավարները բարձրակարգ ու բազմահմուտ պրոֆեսիոնալներ են: Այնպես որ, ոչ մի մարզաձեւում ու ոչ մի հանդիպմանը որեւէ կողմնապահություն չի լինելու:
– Մրցավարները միայն Հայաստանի՞ց են:
– Մենք բոլոր պատվիրակություններին խնդրել ենք, որպեսզի իրենց հետ նաեւ մրցավարներ բերեն: Բայց ոչ բոլորն են կարողացել: Մարզաձեւեր կան, որտեղ շատ բարձր մակարդակի պայքար է ծավալվում հենց նախնական փուլից: Օրինակ, տղամարդկանց բասկետբոլը: Այստեղ, իսկապես, նաեւ բարձր մակարդակի մրցավարություն պետք է ապահովել: Դրա համար ՀԱՕԿ-ի գլխավոր քարտուղար եւ մեր բասկետբոլի ֆեդերացիայի նախագահ Հրաչյա Ռոստոմյանը ֆեդերացիայի միջոցներով Վրաստանից, Ղազախստանից, Իրանից հրավիրել է միջազգային կարգի մրցավարներ, որոնք այստեղ են առաջին օրվանից եւ առաջին օրվանից էլ աշխատում են: Ես գոհ եմ մեր ֆուտբոլի ֆեդերացիայից, որը սիրով տրամադրել է ոչ միայն խաղադաշտերը, համապատասխան գույքը, այլեւ ապահովել բարձրակարգ մրցավարներով՝ միջազգային կարգի մրցավար Կարեն Նալբանդյանի գլխավորությամբ:
Վերջին երկու օրերին, երբ մասնակիցների համար արդեն մեդալներն են տեսանելի, այլ բնույթի դժգոհություններ են ի հայտ գալիս, որոնք գլխավոր մրցավարական հանձնաժողովի իրավասություններից դուրս են: Հատկապես պարտվող թիմերը սկսում են կասկածել մրցակից թիմի կազմում հանդես եկած այս կամ այն անդամի հայ լինելու հարցում, ինչը Խաղերի պարտադիր պահանջ է:
ԱՇՈՏ ՀԱԿՈԲՅԱՆ
«Առավոտ» օրաթերթ
12.08.2015
