Ազատամարտիկ Ալբերտ Պողոսյանը իր մարտական ընկերների հետ նոր է վերադարձել դիրքերից: Վստահեցնում է՝ սահմանին կանգնած հայ զինվորը զգոն է ու մարտունակ:
«Մեր զինվորներին, որ տեսանք, նայեցինք իրար երեսին, ասացինք՝ այստեղ անելիք չունենք, լավ պատրաստված են: Ինչ վերաբերում է, որ հանգիստ ենք, հանգիստ չենք, այդպես ցույց ենք տալիս, Աստված չանի մի բան լինի, մինչեւ Բաքու կգնանք»,- այսօր «Տեսակետ» ակումբում ասաց Ալբերտ Պողոսյանը:
Ազատամարտիկ Գագիկ Մինասյանն էլ մտաբերեց, որ քսաներեք տարի առաջ այս օրը մարտական գործողությունների մեջ էին ու իրենցից շատերը զոհվեցին: Հետո մտահոգվեց, որ վերջին օրերին Ադրբեջանը սկսել է մեծ տրամաչափի զենքեր օգտագործել՝ օգտվելով հայկական կողմի համեստությունից.«Մեզ համեստ ենք պահել, բայց երեկվա դրությամբ այլեւս համեստ չենք, անտիկվար պատասխան ենք տվել: Ադրբեջանցիները խուճապի մեջ են, նույնիսկ իրենց գյուղացիները այլեւս չեն թողնում, որ զորքը իրենց գյուղ մտնի, պատկերացնում եք, փակել են գյուղերը, թույլ չեն տալիս իրենց զինվորը մտնի գյուղ»:
Մարտիկ Մարտիրոսյանն էլ վստահեցրեց՝ պատերազմի վտանգ չկա. «Հնարավոր է այս խաղերը շարունակվեն, բայց պատերազմի հոտ չեմ առնում: Այն, ինչ ադրբեջանցիները սկսել են սահմանին, ցույց է տալիս իրենց երկրի քաղաքական ներքին վիճակը: Ալիեւի կլանը կորցրել է հավասարակշռությունը»:
Կարդացեք նաև
Նրա խոսքով, ադրբեջանցիները չունեն այն մարտավարությունը, որը անհրաժեշտ է պատերազմի համար, բացի դա, ազատամարտիկի համոզմամբ, Ադրբեջանի զինուժը չունի որակ, քանակն է շատ. «Ամպագոռգոռ հայտարարություններով էլ ցույց են տալիս, որ վախի մթնոլորտում են: Նրանք միշտ սովոր են շակալի պես կծել, փախչել, ադրբեջանցի զինվորը չունի հավատ, որ կգրավեն ու հաղթանակի կհասնեն: Եթե մի տոկոսի շանս ունենային, հենց վաղն էլ կսկսեին պատերազմը:
Ժողովուրդ ջան, պատերազմի խուճապ չկա Հայաստանում, մենք կայուն ենք, մեր զինվորները ոչ ոքից պակաս չեն, մեր տղերքը քաջ են»:
Արփինե ՍԻՄՈՆՅԱՆ