Այսօր ՀՀ նախագահ Սերժ Սարգսյանի, սփյուռքի նախարար Հրանուշ Հակոբյանի, մի խումբ ՀՀԿ-ականների, դիվանագետների, Վրաստանի հայ համայնքի ներկայացուցիչների մասնակցությամբ տեղի ունեցավ Գյումրիի «Սրբոց նահատակաց» առաջնորդանիստ եկեղեցու օծումը:
Նշենք, որ այս եկեղեցու շինարարական աշխատանքները սկսվել են 5 տարի առաջ ու ավարտվել վերջերս: Գյումրու ամենակենտրոնում՝ Հաղթանակի պողոտայում գտնվող այս եկեղեցին Հայաստանի, Վրաստանի, Ռուսաստանի ու Արեւելյան Եվրոպայի հայ կաթողիկեների առաջնորդանիստը կամ մայր եկեղեցին է:
Ինչպես տեղեկանում ենք Հայ կաթողիկե եկեղեցու տարածած մամլո հաղորդագրությունից. «Գյումրիի հայ կաթողիկե համայնքը մոտ 90 տարի գործող եկեղեցի չի ունեցել: Սուրբ պատարագի մատուցումը եւ եկեղեցական մյուս խորհրդակատարությունները տեղի են ունեցել առաջնորդարանի մատուռում: Մասամբ պահպանվել է քաղաքի հին կաթողիկե եկեղեցին՝ կառուցված 1843-1855 թթ Ալեքսանդր վարդապետ Արարամյանի ջանքերով: Այն մասնակի ավերվել է 1926 թվականի երկրաշարժի ժամանակ, ապա դարձել ապաստարան անօթեւան ընտանիքների համար, որոնց սերունդներն այդտեղ են ապրում մինչեւ օրս»:
Քանի որ այս ընտանիքներին բնակարաններով ապահովելու հարցը մինչ օրս չի լուծվել, հայ կաթողիկե առաջնորդարանը բարերարների օգնությամբ կառուցել է նոր եկեղեցի:
Կարդացեք նաև
Նշենք, որ ըստ հայ կաթողիկե առաջնորդարանի տեղեկությունների, Շիրակի մարզն ունի 13 կաթողիկե համայնք, կաթողիկեների ընդհանուր թիվը Շիրակի մարզի գյուղերում մոտ 10 հազար է: Իսկ ամբողջ աշխարհում հայ կաթողիկեների թիվը 700 հազար է:
Եկեղեցին կոչվել է «Սրբոց նահատակաց»՝ ի պատիվ Հայոց ցեղասպանության Սուրբ նահատակների անմար հիշատակի:
Օծումը տեւեց մոտ 2-2,5 ժամ, այն օծվեց Հռոմի պապի ներկայացուցիչ, Արեւելյան կաթողիկե եկեղեցիների ժողովի նախագահ, կարդինալ Լեոնարդո Սանդրիի նախագահությամբ եւ Մեծի Տանն Կիլիկիո Հայոց կաթողիկոս Պատրիարք Գրիգոր Պետրոս 20-րդի համանախագահությամբ:
Հայոց Վեհափառը չէր մասնակցում այս արարողությանը, սակայն նրա անունից հնչեց ելույթ: Այդ ելույթում, մասնավորապես խոսվում էր այն մասին, որ վերջին տասնամյակներին խորացել են հարաբերությունները Հայ առաքելական ու Հայ կաթողիկե եկեղեցիների միջեւ, երբեմնի փոխադարձ մեղադրանքներին այսօր փոխարինելու է գալիս սերտ համագործակցությունը:
Մեծի տան Կիլիկիո առաջնորդ Արամ 1-ի անունից հնչած ելույթում էլ խոսվեց հայ ժողովրդի միասնականության մասին, հիշատակվեցին հայոց սուրբ նահատակները, շնորհավորանքներ հնչեցին Գյումրու «Սրբոց նահատակաց» եկեղեցու օծման մասնակիցներին: Ողջույններ փոխանցվեցին Հռոմի պապին, ինչպես նաեւ «սիրո զգացումներ Հայաստանի վսեմաշուք նախագահին՝ մաղթելով անսասանություն, աջակցություն եւ երկար գահակալություն ու ծառայություն»:
Նունե ԱՐԵՎՇԱՏՅԱՆ
