Հոկտեմբերի 19-ին «Արամ Խաչատրյան» համերգասրահում կմեկնարկի Վերադարձի դասական երաժշտության 8-րդ փառատոնը, որը նվիրված է Հայոց ցեղասպանության 100-ամյակին: Այս մասին այսօր Օպերային թատրոնում լրագրողներին հայտնեցին կազմակերպիչները: Համերգի ընթացքում կհնչեն Բախի «Դաշնամուրային կոնցերտը», Տիգրան Մանսուրյանի «Ֆանտազիան», Ս. Լուսիկյանի «Դեպի Գողգոթա» կոնցերտը, որը փառատոնի ընթացքում սպասվելիք պրեմիերաներից է:
«Համերգներին կմասնակցեն երաժիշտներ արտերկրից: Ստեղծվել է «Վերադարձ» կվինտետը, որում հանդես են գալիս երաժիշտներ Ճապոնիայից եւ Ֆրանսիայից»,-ասաց «Արվեստների պատկերասրահ» մշակութային հիմնադրամի նախագահ Մարիամ Շահինյանը:
Առաջին համերգի ժամանակ կնվագի նաեւ ջութակահարուհի Անի Բատիկյանը, ով 2003թ.-ից սովորել եւ դասախոսել է Մեծ Բրիտանիայում. «Հատկանշական է, որ հայտնի ստեղծագործություններ չենք նվագելու: Օրինակ, «Բարոկկոյի կոնցերտը» երկար ժամանակ չի հնչել Հայաստանում, ուստի կարծում եմ՝ հանդիսատեսը մեծ հետաքրքրությամբ կլսի»,-նշեց Անին:
«Փառատոնը նշանակալի է երաժշտական կյանքում, քանի որ մեր երաժիշտներին հնարավորություն է տալիս վերադառնալու Հայաստան եւ հանդես գալու ստեղծագործական յուրօրինակ հաշվետվությամբ»,-կարծում է դաշնակահարուհի Սվետլանա Նավասարդյանը:
Կարդացեք նաև
Կոմպոզիտոր Տիգրան Մանսուրյանի խոսքով՝ վերջին տարիներին երաժշտական կյանքում երիտասարդների բուռն «ծաղկունքը» փոքր-ինչ անսովոր է. «Պարզվում է՝ առանձնահատուկ երաժշտական կարողություններ ունեցող եւ նվիրված երաժիշտներ կան: Մեր երիտասարդ ստեղծագործողների եւ կատարողների անունները շատ են եւ հայտնի են Եվրոպայում: Այդ գործում փառատոնն էլ իր դերակատարությունն ունի»:
Լուիզա ՍՈՒՔԻԱՍՅԱՆ
Տիգրան Մանսուրեան՝ իր հմայքով-միջազգային համբաւով- անշահախնդիր հայրենասիրութեամբ
չի կրնար արդեօք օգտուելով իր հեղինակութենէն եւ վայելած արդար համբաւէն ստեղծել իր շուրջ
երիտասարդ,տաղանդաւոր երգահաններու Միութիւն մը աշխարհով մէկ ցրուած ուժերը համախմբելու -առ նուազն տարին մէկ անգամ Հայրենի հողին վրայ ՓԱՌԱՏՕՆով մը ? ։