Քիչ առաջ Սահմանադրական դատարանը հրապարակեց իր որոշումը «Հրապարակի» եւ iLur.am-ի գործով՝ «Հրապարակի» ներկայացուցիչ իրավապաշտպաններ Արտակ Զեյնալյանի եւ Արայիկ Ղազարյանի եւ iLur.am-ի ներկայացուցիչներ Տիգրան Եգորյանի ու Լուսինե Հակոբյանի դիմումների հետ կապված: Դիմումի նպատակն էր պարզել այն նորմերի սահմանադրականությունը, որոնց հիման վրա պարտադրվել է լրատվամիջոցներին բացահայտել տեղեկատվության աղբյուրը:
ՍԴ-ն որոշեց՝ դատարանի վճիռները՝ բացահայտելու տեղեկատվության աղբյուրները, ենթակա են վերանայման, քանի որ վեճի առարկա դրույթները դիմողների նկատմամբ կիրառվել են այլ մեկնաբանությամբ: ՀՀ Սահմանադրության 102 հոդվածի երկրորդ մասի համաձայն, սույն որոշումը վերջնական է, ուժի մեջ է մտնում հրապարակման պահից»:
Արայիկ Ղազարյան
ՍԴ որոշումը հրապարակելուց հետո իրավապաշտպանները ստացան շնորհավորանքներ: Նրանց գնահատմամբ՝ իրենց դիմումը լիովին բավարարված է: Արայիկ Ղազարյանի խոսքերով՝ «Բավականին հստակ եւ խիստ ձեւակերպումներով վճիռ էր, եւ որեւէ հիմք չունենք ասելու, որ վճիռը չի կատարվի»:
Արտակ Զեյնալյան
Արտակ Զեյնալյանի խոսքերով՝ «Սահմանադրական դատարանը բացահայտել է մեր դիմումի սահմանադրաիրավական բովանդակությունը, նաեւ ասել է, որ Քրեական դատավարության օրենսգրքի 279-րդ հոդվածում շարադրված այլ հաղորդումներ ձեւակերպումը չի կարող ընկալվել որպես հոդվածներ կամ հաղորդում եւ հիմք դառնալ տեղեկատվության աղբյուրը բացահայտելու: ՍԴ-ն նաեւ սա գնահատել է որպես նոր հանգամանքով դատական ակտերի վերանայման հիմք: Մենք ամբողջությամբ բավարարված ենք ՍԴ որոշումից, եռամսյա ժամկետով դիմելու ենք Վճռաբեկ դատարան եւ պահանջելու ենք գործի վերանայում»:
Կարդացեք նաև
Թե հետագայում ՍԴ այս որոշումը ինչ կտա լրագրողներին՝ Արտակ Զեյնալյանի խոսքերով՝ այլեւս ԶԼՄ-ների մասին օրենքի 5-րդ հոդվածը չի կարող մեկնաբանվել այլ կերպ, քան Սահմանադրական դատարանն իր որոշման եզրափակիչ մասում ասել է:
Արայիկ Ղազարյանի խոսքերով՝ երբ բովանդակային մասը հրապարակվի, ավելի հստակ կլինի ամեն ինչ, երբեմն ՍԴ որոշման բովանդակային մասն ավելի հետաքրքիր է լինում:
Իրավապաշտպանները նաեւ ասացին, որ ՍԴ այս որոշումից հետո ԱԺ-ն պետք է հստակեցում մտցնի օրենքներում:
Հռիփսիմե ՋԵԲԵՋՅԱՆ
