Այսօր Sputnik Արմենիա միջազգային մամուլի կենտրոնում տեղի ունեցավ քննարկում «Ռուս–հայկական հարաբերություններ. եվրասիական ինտեգրացումը և տեղեկատվական գործոնը» թեմայով: Մոսկվայից տեսակապին մասնակցում էր Ռուսաստանում Հայերի միության նախագահ Արա Աբրահամյանը:
Նա նշեց, որ Եվրասիական տնտեսական միությունը Հայաստանին տալիս է իրական շանսեր տնտեսական համագործակցության. «Եվրասիական Միության շնորհիվ կարելի է օգտագործել Շանհայի միությունը, Մետաքսի ճանապարհը եւ ԲՐԻՔՍ-ը: Մենք բոլորս էլ հասկանում ենք, թե ինչ տնտեսական հնարավորություններ կարող են լինել»,- ասաց նա:
Նա հայտնեց իր մտահոգությունը, որ Հայաստանում շատ են քննադատությունները Եվրասիական միության վերաբերյալ, համարում են այն ոչ արդյունավետ: Պարոն Աբրահամյանը նշեց, որ դրա համար իրենք նախատեսում են ստեղծել «Եվրասիական դիալոգ» տեղեկատվական կենտրոն, որը պետք է պատասխանի բոլոր այն հարցերին, որոնք կան: Ռուսաստանում Հայերի միության նախագահը նշեց, որ նախատեսում են նման կենտրոն բացել մինչեւ նոյեմբերի վերջ:
Ըստ Արա Աբրահամյանի՝ շուտով նաեւ տեղի է ունենալու Միջազգային ֆորում Եվրասիական տնտեսական միությանը անդամակցող պետությունների համար: Դա հնարավորություն կտա քննարկելու միության շրջանակներում համագործակցությունների հնարավորությունները, առավելություններն եւ թերությունները:
Կարդացեք նաև
Տեսակամուրջին մասնակցող Հայաստանի ներկայացուցչներից ԱԺ ՕԵԿ խմբակցության պատգամավոր Մհեր Շահգելդյանը եւս նշեց, որ Եվրասիական տնտեսական միությանը Հայաստանի անդամակցումը հասարակության շրջանում դժգոհության պատճառ է դառնում տեղեկատվական պակասի պատճառով: Նա նշեց, որ հասարակությունը պետք է մշտապես տեղեկատվություն ստանա գործընթացների, միության շրջանակներում առկա առավելությունների եւ թերությունների մասին: Նա հատկապես կարեւորեց տեղեկատվության սփռման թիրախայնությունը. «Պետք է տեղեկատվություն առանձնացվի բիզնեսմենների համար»,- ասաց նա:
Հռիփսիմե ՀՈՎՀԱՆՆԻՍՅԱՆ
