2014 թվականին 100 հազար բնակչի հաշվարկով քաղցկեղից մահացության188 դեպք է գրանցվել:
Այսօր այս մասին «Մեդիա կենտրոնում» ասուլիսի ժամանակ ասաց «Հայ ուռուցքաբանների ասոցիացիայի նախագահ» Գրիգոր Բադալյանը:
Ըստ նրա, անցած տարի կրկին 100 հազար բնակչի հաշվարկով, Հայաստանում արձանագրվել է քաղցկեղային հիվանդության 277 նոր դեպք: Պարոն Գրիգորյանն անհանգստացած է՝ Հայաստանում, ինչպես ամբողջ աշխարհում, քաղցկեղի տարածվածությունն աճում է տարեկան 3-4 տոկոսով:
«2010-ին Հայաստանում ունեցել ենք 7593 քաղցկեղով առաջնակի հիվանդ, իսկ 2014 թվականին ՝ 8365: Իսկ 2015-ի տվյալներն ամփոփված չեն»,- ասաց պարոն Գրիգորյանը:
Կարդացեք նաև
Անդրադառնալով պատճառներին՝ նա մատնանշեց դրանցից մի քանիսը. «Սնունդը, կանցեռոգեն նյութերն ու ճառագայթումը, ծխախոտը… Հայաստանում տղամարդկանց մոտ առաջին տեղում թոքի քաղցկեղն է, կանանց մոտ՝ կրծքագեղձի քաղցկեղը»:
ՀՀ Առողջապահության ազգային ինստիտուտի տնօրեն Ալեքսանդր Բազարչյանն էլ անդրադարձավ որոշ ժամանակ առաջ հրապարակված մի զեկույցի, ըստ որի, Հայաստանն աշխարհում առաջին տեղն է զբաղեցնում քաղցկեղային հիվանդություններից մահացության թվով: Պարոն Բազարչյանն ասաց, որ զեկույցը հրապարակած կայքն իր համար անհայտ ծագումով է, և իր համար անհասկանալի է՝ ինչ տվյալներ են զեկույց հրապարակողները հիմք ընդունել. «Հայաստանը վատ իմաստով առաջին հորիզոնականում չէ քաղցկեղի տարածվածության առումով, եթե համեմատում ենք այլ երկրների հետ, բայց դա չի նշանակում, թե Հայաստանում ցուցանիշները ցածր են»:
Արփինե ՍԻՄՈՆՅԱՆ
Լուսանկարը՝ «Մեդիա» կենտրոնի
