Գյումրեցի լուսանկարիչ Հայկ Բարսեղյանի՝ անօթեւանների դաժան կյանքը ցուցադրող լուսանկարների հավաքածուն այսօր հայտնվել է ֆրանսահայ աշխարհահռչակ շանսոնիեի ֆեյսբուքյան պաշտոնական էջում: Շառլ Ազնավուրը տարածել է Hay Prod/Media, News, Publishinig/-ի գրառումը՝ գյումրեցի 13 անօթեւան ընտանիքներին բնակարաններ գնելու ծրագրի մասին: Գրառման մեջ ֆրանսերենով նշված է, որ սարսափելի երկրաշարժը մեծ ավերածություններ է պատճառել Հայաստանին. 25.000 մարդ զոհվել են, հազարավոր ընտանիքներ դարձել են անօթեւան, ապրում են առանց հույսի, իսկ Գյումրին Հայաստանի հանրապետության երկրորդ խոշոր քաղաքն է: Նշված է նաեւ, որ սա ծրագիր է, որը նպատակ ունի օգնել աղքատ ու վտանգավոր պայմաններում ապրող անօթեւաններին:
Գյումրու ժուռնալիստների «Ասպարեզ» ակումբի խորհրդի նախագահ Լեւոն Բարսեղյանը, որը պարբերաբար թարմացնում է դրամահավաքի մասին տվյալները, իր ֆեյսբուքյան էջում գրել է. « Շարլ Ազնավուրը սատարում է Գյումրու անօթեւան 13 ընտանիքներին բնակարանով ապահովելու երիտասարդների նախաձեռնած մարաթոնը»:
Ի դեպ, անօթեւանների խնդրով զբաղվող երիտասարդների՝ իրեն հասցեագրված նամակին իր ֆեյսբուքյան պաշտոնական էջում արձագանքել է նաեւ System of down աշխարհահռչակ խմբի հիմնադիր, ամերիկահայ ռոք երաժիշտ Սերժ Թանկյանը:
Լեւոն Բարսեղյանը նաեւ տեղեկացնում է, որ մարաթոնին միացել է «Շիրակ Ջրմուղկոյուղին»` 500.000 դրամի չափով:
Կարդացեք նաև
Լուսանկարը՝ Հայկ Բարսեղյանի ֆեյսբուքյան էջից
Նունե ԱՐԵՎՇԱՏՅԱՆ
