«Հայաստանի ձեռներեցների կոնֆեդերացիայի» նախագահ Տիգրան Հովհաննիսյանը մարտի 9-ին «Նոյյան տապան» մամուլի ակումբում լրագրողների հետ հանդիպման ընթացքում նշեց, որ գրություն են հղել կառավարությանը՝ ինչպես են կարգավորվում տոնավաճառների կազմակերպիչների եւ վաճառականների հարաբերությունները: Էկոնոմիկայի նախարարությունից պատասխան են ստացել, որ առեւտրի ոլորտը, որտեղ հանդես են գալիս փոքր եւ միջին ձեռներեցները, կարգավորվում է «Առեւտրի եւ ծառայությունների մասին» օրենքով, այդ գործունեությունը լիցենզավորման ենթակա է, եւ օրենքի 7-րդ հոդվածի 1-ին մասի է կետով սահմանվում է վարձավճարը, որը չպետք է գերազանցի վաճառականների շրջանառության 1.5 տոկոսը:
«Եթե Մալաթիայի տոնավաճառում աշխատող մեր քաղաքացիները սկսեն վճարել 1.5 տոկոս, ես էլ ուզում եմ հասկանալ, թե ինչպե՞ս կարելի է այսպես շարունակել այդ գործընթացը: Կարող ենք մենք շնորհակալություն հայտնենք պարոն Ծառուկյանին, որ նա բարեգործությամբ է զբաղվում՝ 3 տարի տրամադրելով այդ վաճառատեղերը մարդկանց: Որ հաշվարկենք միգուցե 1.5 տոկոսը հավասարվի կամ գերազանցի կամ միգուցե չգերազանցի: Կարող ենք շնորհակալություն հայտնել Ալեքսանյան Սամվելին, որ Երեւան Սիթիի տոնավաճառներում 1000 դրամ արժեք 1 քառակուսի մետրը»,- ասաց նա:
Տիգրան Հովհաննիսյանը աբսուրդ է համարում այն հանգամանքը, որ վաճառականները եւ տոնավաճառների կազմակերպիչները պետք է իրենց հարաբերությունները պարզեն. «Շուտափույթ ձեւով կառավարությունը պետք է միջամտի եւ պատասխան տա այս օրենքով սահմանված դրույթի վերաբերյալ: Ի՞նչ է նշանակում, որ տոնավաճառների վարձավճարը պետք է սահմանվի շրջանառության 1.5 տոկոսով»:
Կարդացեք նաև
«Հայաստանի տոնավաճառներ» հասարակական կազմակերպության նախագահ Գագիկ Դանիելյանը նշեց, որ տոնավաճառները այդ 1.5 տոկոսին ավելացնում են ծառայությունները, սակայն, ըստ նրա, այդ ծառայությունները վճարովի են. «1մ2-ն արժե 1000 դրամից մինչեւ 40 հազար դրամ, ո՞նց կարելի է այդպես լինի»:
Նկատենք, որ Տիգրան Հովհաննիսյանը, որն այս ասուլիսի ընթացքում ներկայացել էր իբրեւ «Հայաստանի ձեռներեցների կոնֆեդերացիայի» նախագահ, նաեւ «Ավտովարորդների պաշտպանության լիգայի» նախագահն է: Լրագրողները հետաքրքրվեցին՝ պատճառը ո՞րն է, նա պատասխանեց. ««Հայաստանի ձեռներեցների կոնֆեդերացիան» փողոցում է ստեղծվել մեկ տարի առաջ: «Ավտովարորդների պաշտպանության լիգան» իր ամբողջ կազմով եւ յոթ տարբեր առեւտրային հասարակական կազմակերպություններ միավորվել են եւ ստեղծել են «Հայաստանի ձեռներեցների կոնֆեդերացիան», մենք փողոցում ընտրվել ենք»:
Ամի ՉԻՉԱԿՅԱՆ
