Ստամբուլի Բեշիքթաշ թաղամասի մշակույթի կենտրոններից մեկում բացվել է հանրահայտ լուսանկարիչ, հայազգի Արա Գյուլերի լուսանկարների ցուցահանդեսը՝ նվիրված թուրք հայտնի գրող Յաշար Քեմալին։ Այս մասին տեղեկացնում է թուրքական «Անադոլու» լրատվական գործակալությունը։
Ցուցահանդեսի բացմանը ներկա է եղել նաև լրատվական գործակալության լրագրողը, որը կարճ զրույց է ունեցել հայազգի լուսանկարչի հետ։ Հայազգի հանրահայտ Գյուլերը խոսել է լուսանկարչի և լրագրողի տարբերությունների մասին. «Ես լրագրող եմ, լուսանկարիչ չեմ։ Լուսանկարչի ու լրագրողի միջև տարբերությունը հետևյալն է՝ լրագրողը որսում է ակնթարթն ու փախչում, իսկ լուսանկարիչը գնում է տեղի ունեցածի հետքերով և փորձում է արձանագրել իրադարձությունը։ Անհրաժեշտ է հասկանալ այս տարբերությունը։ Լուսանկարիչը կոճակ սեղմող չէ, գործ անող է։ Ես էլ ամեն ինչին մոտենում եմ լրագրության տեսանկյունից և մինչև այս տարիքս աշխատել եմ այդ սկզբունքով։ Այսինքն՝ ինձ նման երկարակյաց լրագրող չկա»։
«Անադոլուի» տեղեկացմամբ՝ Գյուլերի՝ 44 նկարից բաղկացած ցուցահանդեսը այցելուների համար բաց կլինի մինչև 2016թ. մարտի 31-ը։
