Կառավարության կազմում ընդգրկված նախարարությունների ավտոպարկերում հաշվառված ծառայողական տրանսպորտային միջոցների թիվը հասնում է 350-ի։ Այլ կերպ ասած, յուրաքանչյուր նախարարության բաժին է ընկնում միջին հաշվով 19-20 ծառայողական մեքենա։ Իհարկե, դրանք խիստ տարբեր են բաշխված նախարարությունների միջեւ։
Ծառայողական մեքենաների ամենափոքր պարկն ունի միջազգային տնտեսական ինտեգրացման եւ բարեփոխումների նախարարությունը։ Այս գերատեսչության պաշտոնյաներին սպասարկում է ընդամենը 4 ծառայողական մեքենա։ Մինչեւ վերջերս 5 տրանսպորտային միջոց էր հաշվառված սփյուռքի նախարարության աշխատակազմում։ Այս տարի կհամալրվի եւս մեկով։ Որպես այդպիսին, ոչ մեծ տրանսպորտային պարկ ունեցող պետական կառավարման մարմիններից են մշակույթի, կրթության եւ գիտության նախարարությունները։ Առաջինում ծառայողական մեքենաների թիվը 7-ն է, երկրորդում՝ 8-ը։ Արդարադատության նախարարության աշխատակազմին այժմ սպասարկում է 11 տրանսպորտային միջոց։ Այս տարվա պետական բյուջեով նախատեսվում է համալրել եւս 2-ով։
Տրանսպորտային միջոցների պարկը անհամեմատ մեծ է մի քանի նախարարություններում։ Մինչեւ վերջին բաժանումը այդ առումով առաջնայնությունը պատկանում էր ֆինանսների նախարարությանը, որի ավտոպարկում ընդգրկված տրանսպորտային միջոցների քանակը գերազանցում էր ութ տասնյակը։ Իհարկե, մեծ թիվ են կազմում հարկային եւ մաքսային կառույցներին սպասարկող տրանսպորտային միջոցները։
Պարզ է, որ նախկինում հաշվառված ավտոմեքենաների մեծը մասը կտեղափոխվի պետական եկամուտների կոմիտե, որն ունի իր աշխատանքի յուրահատկությունները։
Կարդացեք նաև
Գործադիր իշխանության կազմում տրանսպորտային պարկի մեծությամբ առանձնանում են նաեւ բնապահպանության եւ սոցապ նախարարությունները։ Առաջինում հաշվվում է ավելի քան 40, երկրորդում՝ 34 ծառայողական մեքենա։
Պետական կառավարման ապարատի ծառայողական տրանսպորտային միջոցների պարկում ընդգրկված մեքենաների թիվը հասնում է ընդհանուր առմամբ 1070-ի։
Ս. ԲԵԳԼԱՐՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում