Իրանի Իսլամական Հանրապետության պաշտպանության նախարար Հոսեյն Դեհգանը հեռախոսազրույց է ունեցել ադրբեջանցի իր գործընկերոջ՝ Զաքիր Հասանովի հետ։ Այս մասին տեղեկացնում է Middle east online լրատվական կայքը։
Հեռախոսազրույցի ընթացքում երկու երկրների պաշտպանական գերատեսչությունների ղեկավարները քննարկել են մանրամասներ Լեռնային Ղարաբաղի հակամարտության շփման գոտում ստեղծված իրավիճակի վերաբերյալ։
Աղբյուրի փոխանցմամբ՝ իրանցի նախարարը ընդգծել է հակամարտությունը խաղաղ ճանապարհով կարգավորելու կարևորությունը, ինչպես նաև հայտնել, որ Իրանը կգործադրի բոլոր ջանքերը, որպեսզի թուլացվի լարվածությունը։
Տեղեկացնենք նաև, որ Ադրբեջանի Արտաքին գործերի նախարար Էլմար Մամեդյարովն առաջիկայում նախատեսում է այցելել Իրան, որտեղ հանդիպումներ կունենա Իրանի և Թուրքիայի իր գործընկերների հետ։