Վերջին տարիներին Կառավարության քաղաքականությունը միտված է նրան, որ երեխաները դաստիարակություն ստանան ընտանիքում, նախընտրելի է` կենսաբանական ընտանիքում, իսկ եթե դա հնարավոր չէ, ապա որպես փոխարինող է հանդես գալիս խնամատար ընտանիքը: Այս առումով մեծ քայլեր են իրականացվել: Ներկայումս մեր գործընկերների հետ իրականացնում ենք մի շարք ծրագրեր, որպեսզի այս խնդիրը լուծվի եւ երեխաները ստանան լրացուցիչ աջակցություն»,-Սիրահարների այգում այսօր` հունիսի 1-ին, «Սեյվ դը չիլդրեն» հայաստանյան կազմակերպության` Երեխաների պաշտպանության միջազգային օրվա առթիվ նախաձեռնած միջոցառման ժամանակ լրագրողների հետ զրույցում ասաց ՀՀ աշխատանքի եւ սոցիալական հարցերի նախարար Արտեմ Ասատրյանը:
Նա ընդգծեց, որ գիշերօթիկ հաստատությունները նախատեսում են փոխարինել ընտանիքի եւ երեխայի աջակցության կենտրոնների, որպեսզի ընտանիքներին մատուցվեն արտակենտրոնային ծառայություններ` այդ կերպ երեխաներին պահելով ընտանիքներում: Նախարարը տեղեկացրեց, որ անապահովության գնահատման համակարգում ներկայում գրանցված է ընտանեկան նպաստ ստացող 106 հազար ընտանիք:
Aravot.am-ի հարցին, թե ներկայում որքա՞ն է երեխաների աղքատության ցուցանիշը, Արտեմ Ասատրյանն ասաց` մոտ 34 տոկոս. «Բոլոր ծրագրերը, որոնք այսօր իրականացվում են, ուղղված են առաջին հերթին ընտանիքների աղքատության հաղթահարմանը: Աղքատությունն ինքնին բազմաբնույթ գործոն է»:
Կարդացեք նաև
Լուիզա ՍՈՒՔԻԱՍՅԱՆ
