Հայկական ուսումնասիրությունների ԱՆԻ կենտրոնը, որպես Արցախյան հարցով մասնագիտացված հաստատություն, դատապարտում է Ստեփանակերտում Հայկ Խանումյանի հանդեպ իրականացված անմարդկային, ոչնչով չարդարացված հաշվեհարդարը:
Խանումյանի նկատմամբ իրականացված քստմնելի, ստոր հանցագործությունը չի կարող չունենալ քաղաքական ենթատեքստ, քանի որ նա Արցախի Ազգային ժողովի պատգամավոր է, Արցախում գրանցված և օրինական գործող քաղաքական կուսակցության համահիմնադիր ու ղեկավար:
Փաստացի, Խանումյանը միակ ընդդիմադիր պատգամավորն է, ով հետևողականորեն քննադատել է իշխանությունների քաղաքականությունը տարբեր հարցերում, բայց նաև կառուցողական դիրքորոշում ունեցել նույն այդ իշխանությունների կողմից որդեգրված այլ նախաձեռնությունների նկատմամբ:
Խանումյանը և նրա երիտասարդ կուսակիցները, ստեղծելով Ազգային վերածնունդ կուսակցությունը և հաղթահարելով խորհրդարան անցնելու հինգ տոկոսի շեմը առաջին իսկ իրենց ընտրություններում՝ նոր ոճ, նոր մշակույթ, նոր շունչ և նոր երանգ էին բերել Արցախի ներքաղաքական դաշտ:
Կարդացեք նաև
Խանումյանի հանդեպ այս ոճրագործ արարքը առաջին հերթին վնասում է Արցախի ժողովրդավարական իմիջին և հարվածում հայկական երկրորդ, չճանաչված հանրապետության հեղինակությանը՝ նրան դնելով նույն նժարի վրա բռնատիրական Ադրբեջանի հետ, որտեղ այլակարծությունը խեղդվում է ծեծ ու ջարդի, բանտարկության միջոցով և կյանքի հանդեպ սպառնալիքներով:
Հայկական ուսումնասիրությունների ԱՆԻ կենտրոնը Արցախի իշխանություններին, առաջին հերթին՝ իրավապահ մարմիններին, հորդորում է չկոծկել օրը ցերեկով կատարված հանցագործությունը, շուտափույթ կերպով ձերբակալել հանցագործներին և նրանց պատժել օրենքի ողջ խստությամբ:
Հայկ Խանումյանի նկատմամբ ստորագույն հանցագործության պատասխանատուն Արցախի բարձրագույն իշխանություններն են, եթե ժամ առաջ հանցագործները չկանգնեն դատարանի առաջ:
Հակառակ դեպքում, ոչ միայն կասկածի տակ է դրվելու Արցախի իշխանությունների՝ ժողովրդավարությանը, մարդու իրավունքների պաշտպանությանն ու օրենքի գերակայությանը նվիրված լինելու հայտարարությունները, այլև սեպ է խրվելու Հայաստան-Արցախ արհեստական տարանջատման մեջ, ինչպես դա եղավ Ժիրայր Սեֆիլյանի և նրա համախոհների հանդեպ Բերձորում իրականացված բռնությունների օրերին:
Դատապարտելի են նաև Արցախի իշխանական և իշխանամերձ շրջանակների ակնարկները Հայկ Խանումյանի՝ բնիկ արցախցի չլինելու իրողության շեշտադրելը:
Հայկական ուսումնասիրությունների ԱՆԻ կենտրոն
