«Օֆշորի գործով» շարունակվում են հարցաքննությունները: Հունիսի 9-ին Էրեբունի եւ Նուբարաշեն վարչական շրջանների ընդհանուր իրավասության դատարանում հարցաքննվեց Փորձագիտությունների ազգային բյուրոյի նախկին փորձագետ Գեւորգ Մկրտչյանը:
Պատասխանելով գործով ամբաստանյալ Աշոտ Սուքիասյանի պաշտպան Յուրիկ Խաչատրյանի հարցին՝ փորձագետն ասաց, որ ստուգումների ընթացքում «Ձորագյուղ» արտադրական կոոպերատիվում խախտումներ չեն հայտնաբերվել, սակայն չի կարող ասել, թե փաստացի ինչ է կատարվել:
Աշոտ Սուքիասյանը հետաքրքրվեց, թե փորձագետը «Ձորագյուղ» արտադրական կոոպերատիվի գործն ուսումնասիրե՞լ է, Գեւորգ Մկրտչյանը պատասխանեց՝ այո: Ամբաստանյալը հստակեցրեց՝ 30 տարիների ընթացքում, փորձագետն ասաց, որ ուսումնասիրել է միայն անհրաժեշտ ժամանակահատվածում:
Աշոտ Սուքիասյանը հետաքրքրվեց, թե այդ ընթացքում իրավունք ունե՞ն ոսկի գնել, Գեւորգ Մկրտչյանը պատասխանեց, որ չէր արգելվում: Ըստ նրա, ոսկի ձեռք բերելն անօրինական չի եղել:
Դատավոր Վլադիմիր Գրիգորյանը հայտարարեց, որ գործով պետք է հարցաքննվեն նաեւ Կենտրոնական բանկի երկու ներկայացուցիչներ, սակայն հարցաքննությունը տեղի կունենա հաջորդ դատական նիստին: Դատական նիստը հետաձգվեց, հաջորդ դատական նիստը տեղի կունենա հունիսի 16-ին:
Կարդացեք նաև
Ամի ՉԻՉԱԿՅԱՆ
