«Մենք տեսել ենք, թե ինչպես է Թուրքիան հետ կանչում իր դիվանագետներին այն երկրներից, որոնք 1915-ի օսմանյան ջարդերը հայերի նկատմամբ բնութագրել են որպես ցեղասպանություն»,-Եվրոպայի խորհրդի խորհրդարանական վեհաժողովի (ԵԽԽՎ) ամառային նստաշրջանի լիագումար նիստին, երբ քննարկվում էր «Թուրքիայում ժողովրդավարական ինստիտուտների գործունեությունը» խորագրով զեկույցը, հայտարարեց շվեդ պատվիրակ Մարկուս Վիչելը (լուսանկարում):
Թուրքիայի հասցեին քննադատության շարանը պարունակում էր քրդական խնդիրը, Սիրիայում զինված հարձակումները, քաղաքացիների նկատմամբ հալածանքները, ընդդիմադիր, հատկապես քուրդ պատգամավորներին անձեռնմխելիությունից զրկելը: Պատվիրակը փաստեց, որ ժամանակին որպես ժողովրդավարական մուսուլմանական երկրի օրինակ համարվող Թուրքիան այսօր լուրջ խնդիրներ ունի:
Պատվիրակը նշեց նաև, որ «զրո խնդիր հարևանների հետ» կարգախոսը արտաքին քաղաքականության ոլորտում որդեգրած Թուրքիայի ժողովրդավարությունն այսօր խամրում է, փոխարենը երկրում նոր թափ են առնում հետապնդումները:
Տաթև ՀԱՐՈՒԹՅՈՒՆՅԱՆ
