Գերմանական հանրահայտ Deutsche Welle պարբերականի թղթակիցը մեկնել է Ադրբեջան, որտեղ փորձել է պարզել 2016թ. ապրիլի սկզբին հայ-ադրբեջանական բախումներից հետո այնտեղի բնակիչների առօրյային և կենցաղին վերաբերվող մանրամասները։
Հեղինակ նախ այցելել է Թարթառ, որը Ադրբեջանի մայրաքաղաք Բաքվից հեռու է 400 կիլոմետր։ Բնակավայրի իշխանությունները մինչև հիմա փորձում են քայլեր ձեռնարկել, որ կարողանան վերացնել այն հետևանքները, որոնց պատճառը 2016թ. ապրիլի սկզբին տեղի ունեցած ռազմական գործողություններն էին։
Հոդվածագիրն իր ռեպորտաժի սկզբում հարցազրույց է վերցրել Թարթառի բնակիչ, 67-ամյա Օլգա Կրուգլովայից, որը հաստատվել է այդ բնակավայրում, երբ 17 տարեկան էր։ Կրուգլովան պատմել է ապրիլին տեղի ունեցածի մասին՝ նշելով, որ ինքը տանը չի եղել, երբ հայկական ուժերը, ի պատասխան ադրբեջանական սադրանքների, գործողություններ են ձեռնարկել Թարթառի ուղղությամբ։ Փոխարենը տանը եղել է նրա աղջիկը, և միայն Աստծո կամոք նրան ոչինչ չի պատահել. «Շատ դժվար ժամանակներ էին։ Հարձակումներից հետո ես չէի կարողանում քնել գիշերները, ես վեր էի կենում և լաց լինում»։
Կարդացեք նաև
Գերմանական պարբերականի թղթակիցը զրուցել է նաև ադրբեջանցի փախստականների հետ։ 80-ամյա Գուլերա Ալիևան, որը 1992-94թթ. պատերազմից հետո ապրում է Բաքվից ոչ հեռու Յենի Յասամալ կոչվող բնակավայրում, ասել է, որ մասնակցել է 90-ականների ռազմական գործողություններին և, եթե կարիք լինի, ինքը կրկին պատրաստ է մեկնել ճակատ, բայց այժմ նրա հիմնական մտահոգությունն իր 44 և 46-ամյա որդիներին ամուսնացնելն է։
Արցախյան հակամարտության հետևանքով փախստական համարվող Յենի Յասամալի ևս մեկ բնակչուհի՝ 42-ամյա Ռանա Ալիևան ապրում է իր երեխայի հետ փոքր սենյակում, բայց դա չի խանգարում նրան հայտնել իր շնորհակալությունը ադրբեջանական իշխանություններին՝ գոնե այդպիսի պայմաններ ապահովելու համար։
