Ռուսաստանի Դաշնության արտաքին գործերի նախարար Սերգեյ Լավրովը 2016թ. հուլիսի 11-12-ին կայցելի Ադրբեջանի մայրաքաղաք Բաքու, որտեղ կքննարկի Լեռնային Ղարաբաղի հակամարտության կարգավորման վերաբերյալ մի շարք հարցեր։ Այս մասին հայտարարել է ՌԴ արտաքին գործերի նախարարության հատուկ ներկայացուցիչ Մարիա Զախարովան, տեղեկացնում է ռուսական «ՌԻԱ» լրատվական գործակալությունը։
Իր խոսքում Զախարովան մասնավորապես ասել է. «Հուլիսի 11-12-ին ՌԴ ԱԳ նախարար Լավրովը աշխատանքային այցով կմեկնի Ադրբեջան, որտեղ կայանալիք հանդիպումների ընթացքում կքննարկի երկու երկրների օրակարգային հարցեր, ինչպես նաև մտքեր կփոխանակի Լեռնային Ղարաբաղի հակամարտության կարգավորման վերաբերյալ»։
Զախարովան տեղեկացրել է նաև, որ Բաքու կատարելիք այցելությունից հետո Սերգեյ Լավրովը հուլիսի 12-13-ին կլինի Ղազախստանում, որտեղ կմասնակցի մերձկասպյան պետությունների արտաքին գործերի նախարարների գագաթնաժողովին։
