ՀՀ Ազգային Ավիացիոն Միավորման հայտարարությունը
Հայաստանի Հանրապետությունը փաստացի գտնվում է ռազմական իրավիճակում: Միջազգային հարաբերությունների բարդ և անկանխատեսելի ժամանակաշրջանը լի է բազմաթիվ վտանգներով: Այդ իրադրությունից ելնելով՝ մենք բազմիցս բարձրաձայնել ենք հանրապետության ռազմավարական նշանակության օբյեկտների պահպանության և արդիականացման անհրաժեշտության մասին:
«Զվարթնոց» օդանավակայանի պետական համալիրի հարցով անցկացրել ենք մի շարք քննարկումներ և հավանություն ենք տվել օդանավակայանի ճարտարապետական նախագծի հեղինակների ժառանգների և «Հայնախագիծ» ՓԲԸ-ի կողմից կատարված առաջարկությունների հիման վրա «Զվարթնոց» օդանավակայանի շենքի արդիականացման այն նախագծին, որը հնարավորություն է ապահովում քիչ ներդրումներով օգտագործել համալիրը իր նպատակային նշանակության համաձայն:
Հանրային Խորհրդի կարծիքը անտեսող՝ Զվարթնոց օդանավակայանի պետական համալիրի մասնակի ապամոնտաժման որոշումը ակնհայտորեն հակասում է ՀՀ ռազմական դոկտրինայի դրույթներին, որի համաձայն` պետությունը պարտավոր է պահպանել և զարգացնել քաղաքացիական օդանավակայանները ռազմական նշանակության չափանիշներին համապատասխան: Այդ որոշումը վերացնում է շենքի ըստ նպատակային նշանակության օգտագործումը, ինչը, մեր կարծիքով, դավադրական հարված է հայ ժողովրդի մեջքին` մեր երկրի համար ամենածանր պահին:
Պահանջու՛մ ենք․ կասեցնել «Զվարթնոց» օդանավակայանի համալիրի մասնակի ապամոնտաժման գործընթացը և հարուցել քննություն՝ պետական սեփականության դեմ կատարված ոտնձգությունը բացահայտելու և մեղավորներին պատասխանատվության ենթարկելու նպատակով:
ՀՀ Ազգային Ավիացիոն Միավորման Նախագահ
Դ. Աթբաշյան
ՀՀ, ք. Երեւան, 06 հուլիսի, 2016թ.
