Ֆրանսահայ ռեժիսոր Առնո Խայաջանյանի «Քարքարոտ ճամփաներ» ֆիլմն Անատոլիայում կատարած մի շրջագայության պատմություն է: Նա սկսում է ճամփորդել Թուրքիայում՝ Հայոց ցեղասպանությունը վերապրած իր նախնիների հողերում: Սկսելով մի գեղանկարից, պատահական հանդիպումներից և իր հարազատների մասին պատմություններից՝ նա բացահայտում է բարեպաշտների՝ այն բոլոր անհայտ մարդկանց սակավածանոթ գործերը, որոնք կյանքեր են փրկել 1915-ին:
Վավերագրական ֆիլմն ընդգրկված է «Ոսկե ծիրան» Երևանի 13-րդ միջազգային կինոփառատոնի «Հայկական համայնապատկեր» ծրագրում:
«20 տարեկան էի, երբ իմացա, որ նախապապս Արևմտյան Հայաստանից է եղել: Հայոց ցեղասպանության ժամանակ նա թաքնվել է թուրքերից և մի քրդի օգնությամբ փրկվել: Որոշեցի ֆիլմ նկարահանել ու պատմել այն մարդկանց մասին, որոնք Ցեղասպանության օրերին փրկել են հայերին:
Երկու տարի ուսումնասիրում էի: Ծանոթացա Ցեղասպանությունը վերապրածների ընտանիքների հետ: Հասկացա, որ յուրաքանչյուր վերապրողի պատմության մեջ եղել է մեկը, որը փրկել է ընտանիքի անդամներից որևէ մեկին»,- «Գոլդեն թյուլիփ» հյուրանոցում այսօր լրագրողների հետ հանդիպման ժամանակ ասաց Առնո Խայաջանյանը:
Կարդացեք նաև
Ի դեպ, Իսմայիլիայի միջազգային կինոփառատանում «Քարքարոտ ճամփաներ» ֆիլմն այս տարի արժանացել է ժյուրիի հատուկ մրցանակի:
Ֆիլմը «Մոսկվա» կինոթատրոնում ցուցադրվել է հուլիսի 11-ին, կցուցադրվի նաև հուլիսի 13-ին:
Սիրանուշ ՀԱՅՐԱՊԵՏՅԱՆ
