Գովազդային վահանակներից «կխոսեն» հերոսները
«Շուտով Երեւանի եւ Ստեփանակերտի արտաքին գովազդային վահանակներից իրենց սիրելի գրքերով ընթերցողներին կներկայանան ապրիլյան քառօրյա պատերազմի 5 հերոսներ»,- «Առավոտին» հայտնեց Հայաստանի մշակութային հիմնադրամի տնօրեն Մանուկ Նիգոյանը: Նա հիշեցրեց, թե շուրջ երեք տարի գործող հիմնադրամի կողմից իրականացվող այլ միջոցառումների թվում 5-րդ անգամ անցկացվող «Խորհուրդ են տալիս հայտնիները» խորագիրը կրող նախագծի նպատակն ի սկզբանե եղել է տարբեր ոլորտների հայտնի գործիչների կողմից ընթերցողին խորհուրդ տալ՝ կարդալ աշխարհի լավագույն գրքերի հայերեն թարգմանությունների ցանկից մեկը՝ իրենց ընտրությամբ:
«Անձամբ եմ հանդիպել հերոսների հետ, որոնցից ոմանք հայտնի են, օրինակ, հակառակորդի ուղղաթիռի խոցմամբ, տանկերի պայթեցման դեպքերով, անօդաչու սարքի ոչնչացմամբ եւ այլ հերոսական գործողություններով: «Մարտական արիության համար», «Մարտական խաչ» 1-ին եւ 2-րդ աստիճանի շքանշաններով պարգեւատրված մայոր Էդիկ Մալոյանը խորհուրդ է տալիս կարդալ Լյուբկո Դերեշի «Խաղաղարարը» վեպը, շարքային Գեւորգ Մանուկյանը՝ Բլաժե Մինեւսկու «Նշանը», սերժանտ Ռաֆայել Հովհաննիսյանը՝ Մուրացանի «Գեւորգ Մարզպետունին», կրտսեր սերժանտ Մուշեղ Թովմասյանը՝ Լեւոն Խեչոյանի «Արշակ արքա Դրաստամատ ներքինին», իսկ կապիտան Անդրանիկ Հակոբյանը՝ Ջերոմ Սելինջերի «Փրկիչը տարեկանի արտում» ստեղծագործությունը»,- հայտնեց Մանուկ Նիգոյանը:
ՍԱՄՎԵԼ ԴԱՆԻԵԼՅԱՆ
Կարդացեք նաև
«Առավոտ»
06.08.2016
