Ռիո դե Ժանեյրոյի «Մարականա» լեգենդար ստադիոնում կայացավ 31-րդ ամառային օլիմպիական խաղերի բացման պաշտոնական արարողությունը, իսկ այսօրվանից Հայաստանի օլիմպիական հավաքականի մարզիկները սկսում են պայքարը:
Մեր 33 մարզիկների մրցելույթների «բացման ծանրությունն» ընկել է մինչեւ 60 կգ քաշային Հովհաննես Դավթյանի ուսերին, որը 1/32 եզրափակչում գոտեմարտելու է Ավստրիայի ներկայացուցիչ Լյուդվիգ Պայչերի հետ:
Քիչ ավելի ուշ պայքարի մեջ կներգրավվեն սպորտային մարմնամարզիկներ Հարություն Մերդինյանը եւ Արթուր Դավթյանը, որոնցից Ռիո դե Ժանեյրոյում բավականին լուրջ ակնկալիքներ ունենք: Օրվա ընթացքում կտրվի նաեւ բռնցքամարտի օլիմպիական մրցաշարի մեկնարկը: Հայաստանի հինգ ներկայացուցիչներից առաջինը ռինգ մտնելու է 49 կգ քաշային Արթուր Հովհաննիսյանը, որի մրցակիցը վիճակահանությամբ որակավորման առաջին փուլում լինելու է իսպանացի Սամյուել Կարմոնա Հերեդիան:
Հայտնի են նաեւ մեր մյուս բռնցքամարտիկների մեկնարկային մրցելույթների օրերն ու նախնական մենամարտերում մրցակիցների անունները:
Օգոստոսի 7
Կարդացեք նաև
69 կգ քաշային կարգ՝ Ուինսթոն Հիլլ (Ֆիջի)-Վլադիմիր Մարգարյան:
Օգոստոսի 10
56 կգ՝ Արամ Ավագյան-Արաշի Մորիսակա (Ճապոնիա)
64 կգ՝ Լուիս Մարտին Արկոն (Վենեսուելա)-Հովհաննես Բաչկով
Օգոստոսի 13
52 կգ՝ Ռոնալդ Սերուգո (Ուգանդա)-Նարեկ Աբգարյան
Վաղը՝ օգոստոսի 7-ին, կսկսվի մարմնամարզության կանանց մրցաշարը, որտեղ հանդես է գալու Հուրի Գեղեշյանը, առաջին մենամարտը կանցկացնի 69 կգ քաշային բռնցքամարտիկ Վլադիմիր Մարգարյանը, իսկ օգոստոսի 8-ին կհետեւենք հրաձիգ Հրաչ Բաբայանին եւ բռնցքամարտիկներ Արթուր Հովհաննիսյանի եւ Վլադիմիր Մարգարյանի 2-րդ մենամարտերին, եթե, իհարկե, նրանք հաղթեն իրենց առաջին մրցակիցներին:
ԱՇՈՏ ՀԱԿՈԲՅԱՆ
«Առավոտ»
06.08.2016