Երեք օր առաջ անհայտ անձինք գիշերը թալանել են Գյումրու Հաղթանակի պողոտայի վրա գտնվող անհատ ձեռնարկատեր Սերգեյ Հայրապետյանի անվամբ գրանցված ստուդիայի թանկարժեք տեխնիկան: Նշենք, որ Սերգեյ Հայրապետյանը «Վայ մամա ջան» ֆիլմի ռեժիսորն է:
Սերգեյ Հայրապետյանը Aravot.am-ին պատմեց, որ իրեն պատկանող ստուդիայից տարել են երեք պրոֆեսիոնալ տեսախցիկներ, երեք ֆոտոապարատներ ու երեք օբյեկտիվներ, որոնք իրենց արժեքով չեն զիջում տեսախցիկներին: «Մեր ընկերոջ տեխնիկան, որը գտնվում էր մեր ստուդիայում, ևս գողացել են, այդ օրը մեծ նկարահանում ունեինք Երևանում, առավոտ եկանք, տեսանք տեխնիկան հավաքած է: Ընդ որում, ստուդիայի դուռը բացել են հարմարեցված բանալիով:
Հիմա մեր անհանգստությունն այն է, որ արագ բացահայտվի գողությունը, այդ տեխնիկան բոլորը ճանաչում են, ուր տանեն հանրապետության մեջ, բոլորը գիտեն, որ մերն է, եթե գողություն անողն այնքան խորամանկ է եղել, որ բանալի է սարքել տվել, այդքան հիմար չի գտնվի, որ տեխնիկան Գյումրիում կամ Երևանում փորձի վաճառել: Ենթադրում եմ, որ կտանի Վրաստան, կփորձի սահմանն անցկացնել: Ոստիկանությանն առաջարկեցի հենց այդ պահին ստուգել, երեք օր անցել է, նոր են ասում ձեր տեխնիկայի գրքերը բերեք, որ տանենք մաքսային, ախր դա պիտի նույն վայրկյանին արվեր: Իմ միակ մտավախությունն այն է, որ ոստիկանությունը իմիջիայլոց չմոտենա գողության բացահայտմանը, դրանք շատ թանկարժեք են, մենք շատ ենք տուժել», -ասաց մեր զրուցակիցը:
Նունե ԱՐԵՎՇԱՏՅԱՆ
