Հարկային նոր օրենսգրքի քննարկումն է ԱԺ արտահերթ նիստում:
ՊԵԿ փոխնախագահ Վախթանգ Միրումյանն (լուսանկարում) ասաց, որ առաջին ընթերցումից հետո բազմաթիվ առաջարկներ են ստացել գործարարներից, պատգամավորներից, վերջիններիս առաջարկների գերակշիռ մեծամասնությունն ընդունվել է:
Հիմա առաջարկվում է, որ 120-ից մինչեւ 150 հազար դրամ աշխատավարձերի պարագայում 23 տոկոս եկամտահարկի դրույքաչափ կիրառել: Գործող օրենքում 24.4 եւ 26 տոկոս դրույքաչափ էր նախատեսվում: 2 մլն դրամից ավելի աշխատավարձերի դեպքում գործող օրենքում առկա դրույքաչափն է ուժի մեջ՝ 36 տոկոս: Ընդհանուր առմամբ՝ արդյունավետ եկամտահարկի դրույքաչափերը նվազել են:
Մինչեւ 280 հազար դրամ աշխատավարձ ստացողները, որոնք կազմում են ՀՀ վարձու աշխատողների 89, 8 տոկոսը, կամ 550 հազար քաղաքացիներ, կունենան եկամտահարկի տնտեսումներ: Դրանից բարձր աշխատավարձի դեպքում եկամտահարկի դրույքաչափը բարձրանում է: Առաջին ընթերցման նախագծով 4,3 տոկոսով էր բարձրանում լրամշակված տարբերակում՝ 1.72 տոկոսով: Այսինքն, այստեղ էլ է բեռը նվազում:
Կարդացեք նաև
Շրջանառության հարկը կամ ԱԱՀ շեմը, որը նախկին տարբերակում նախատեսված էր 40 մլն դրամ, հիմա առաջարկվում է շեմը սահմանել 58,35 մլն դրամ, այսինքն՝ այնքան, որքան մինչեւ շեմի բարձրացումն էր:
Շահաբաժինների համար նախատեսվում է չհարկել դրանք, եթե ներդրում է արվում տվյալ ընկերությունում:
ԱԱՀ-ի գծով այն փոփոխությունը, որն առաջարկել էր կառավարությունը, նախնական տարբերակում չեղյալ են համարել: Վախթանգ Միրումյանն ասաց, որ շինարարական կազմակերպությունների ներկայացուցիչների հետ քննարկումների արդյունքում հասկացել են, որ կոռուպցիոն ռիսկեր կան եւ գործող կարգավորումը թողնում են անփոփոխ:
Հարկային օրենսդրությամբ սահմանված հարկերը ուշ վճարելու համար տույժերն էապես նվազեցվում են: Գործող օրենքում 0.15 տոկոս էր նախատեսվում, հիմա սահմանվում է 0.75 տոկոս: Կառավարությունը գտնում է, որ հնարավոր է, որ հարկատուն կարգապահ է եղել, ինչ-ինչ պատճառով չի հասցրել վճարել, նրան այդքան նեղություն չպետք է տան, որ կարողանա շարունակել իր գործունեությունը, ոչ թե բիզնեսը փակի ու գնա:
ԱԱՀ-ի գծով մի քանի արտոնություններ առաջարկվում է հանել, եթե կողմ է հանդիսանում պետությունը: Ներգնա զբոսաշրջության համար արտոնությունը նույնպես առաջարկվում է հանել:
Ինչ վերաբերում է ակցիզային հարկին, ալկոհոլային խմիչքների եւ ծխախոտի արտադրության համար 15 տոկոս սպեցիֆիկ դրույքաչափի բարձրացում է սպասվում: Վերջնական տարբերակում որոշվել է, որ սպեցիֆիկ դրույքաչափերը դարձյալ բարձրանալու են տարեկան 15 տոկոսով, բայց արժեքային դրույքաչափերը սահմանափակվում են ընդամենը 15 տոկոսով, որ տեղական արտադրողներն ու ներմուծողները շուկայում ունենան հավասար պայմաններ:
Շահութահարկի արտոնության վերացում էր նախատեսվում 2025-ից նրանց համար, որոնք գյուղատնտեսական արտադրությամբ էին զբաղվում: Հիմա առաջարկվում է, որ վիճակախաղերի եւ ինտերնետ շահումով խաղերի գործունեության համար պետտուրքը բարձրացնեն 5 անգամ՝ այդ արտոնության բյուջեի կորուստները վերականգնելու համար:
Հռիփսիմե ՋԵԲԵՋՅԱՆ
