Այսօր աշխատանքային այցով Գյումրի էր եկել ՀՀ մշակույթի նորանշանակ նախարար Արմեն Ամիրյանը։ Ի տարբերություն շատ նախարարների ու բարձրաստիճան այլ պաշտոնյաների, որոնք մարզպետարանի շենքի դիմաց սպասեցնել են տալիս այսպես ասած դիմավորողներին, Արմեն Ամիրյանի այցը մի տեսակ շատ համեստ էր․ նա եկավ անսպասելի` իր տեղակալի ուղեկցությամբ։ Նախարարը դատարկաձեռն չէր եկել․ նա նվեր գիրք էր բերել Շիրակի դաշնակցական մարզպետ Հովսեփ Սիմոնյանին։
Արմեն Ամիրյանն ասաց, որ պատահական չէ իր այցը սկսել է Շիրակի մարզից, այստեղ կան բազմաթիվ մշակութային խնդիրներ, բացի այդ նախաձեռնել են մշակութային նոր ծրագրեր Գյումրիում․ Սամվել Բալասանյանի հետ արդեն համաձայնության են եկել երգչախմբային ու դուդուկի միջազգային փառատոներն անցկացնել երկրորդ քաղաքում։ «Այն համոզմունքն ունենք, որ Երևանը պետք է մի քիչ բեռնաթափել մշակութային այդ ագրեսիայից,որովհետև լավ իմաստով ագրեսիա է մշակութային և պետք է բեռնաթափել դեպի մարզեր, իսկ ինչո՞ւ հենց Գյումրի, որովհետև Գյումրին մշակութային օրրանն է»,-ասաց նախարարը։
Այնուհետ խոսելով մարզային գրադարան կատարելիք իր այցից՝ նա ասաց, որ գրադարանները փորձում են վերազինել ու վերաձևակերպել։ Կենտրոնում պահելով գիրքը՝ փորձում են գրադարանները դարձնել ընտանեկան ժամանցի ու հանգստի կենտրոն։ «Ունենալով որոշակի կառուցվածքային մոդել՝ մենք փորձելու ենք այստեղ ևս մասնավոր ներդրողների, մասնավոր մարդկանց ու ընկերությունների հետ այդ ծրագիրն իրականություն դարձնել, որովհետև հավատացեք մինչ մասնավորի ձեռքը չկպնի գործին, գործն առաջ չի գնալու։ Սովորաբար բոլոր տեղերում պետությունը վատ կառավարիչ է, մենք պետք է հնարավորություն տանք մասնավորին, որ մասնավորը շահագրգռված իր քաղաքով, իր մարզով, իր շրջանով, իր հայրենիքով ոգևորված կարողանա ներդրում անել ու պաշտպանել իր ներդրումը, պաշտպանել բոլոր իմաստներով։ Գրադարանային գործի առողջացման ծրագրում ներգրավելու ենք մասնավորի ներդրումը։ Համոզված ենք, որ շատ արագ կունենաք նոր մոդել․ ընտանիքը ինչպես կինոթատրոն է հաճախում, այնպես էլ կարող է գրադարան հաճախել, իր ժամանցն անցկացնել այնտեղ», -ասաց նախարարը։
Կարդացեք նաև
Անդրադառնալով Գյումրու դրամատիկական թատրոնի տնօրենի ընտրությանը՝ Արմեն Ամիրյանն ասաց, որ կաշխատեն մաքսիմալ ճիշտ ընտրություն կատարել։ Շիրակի մարզպետի խորհրդական Հասմիկ Կիրակոսյանն էլ, լսելով ՀՀ մշակույթի նախարարին, կարծիք հայտնեց, որ Արմեն Ամիրյանը սիրուն հայերենով խոսող պաշտոնյաներից է։
Նունե ԱՐԵՎՇԱՏՅԱՆ
