Ըստ ՊՈԱԿ-ի մասին օրենքի՝ «շեֆը» թատրոնի տնօրենն է, իսկ գեղարվեստական ղեկավարը, որը թատրոնի դիմագիծն է կերտում, աշխատում է տնօրենի ենթակայությամբ։ Ավելին, այդ օրենքը լծակ է ստեղծագործական տարաձայնություններ ունեցող գլխավոր ռեժիսորից կամ գեղարվեստական ղեկավարից ազատվելու համար: Ոմանց համոզմամբ՝ Թատրոնի մասին օրենքի դեպքում հնարավոր կլինի կարգավորել տնօրեն-գեղարվեստական ղեկավար հարաբերությունները:
Գ. Սունդուկյանի անվան ազգային ակադեմիական թատրոնի գեղարվեստական ղեկավար Արմեն Էլբակյանը, սակայն, այլ կարծիքի է: Նրա համոզմամբ՝ այդ կնճիռը կարելի է այլ կերպ հարթել: «Իմ կարծիքով՝ դա կարելի է կարգավորել թատրոնի կանոնադրությամբ, որովհետեւ Թատրոնի մասին օրենքը շատ բարդ ինստիտուտ է, ու պատահական չէ, որ Ռուսաստանի նման հզոր երկիրը դեռեւս չի ընդունել նման օրենք: Օրենք ստեղծելը դժվար է, հազար ու մի բանի հետ պետք է համապատասխանեցնել»,- «Առավոտի» հետ զրույցում շեշտեց պարոն Էլբակյանը: Մշակույթի նախարար Արմեն Ամիրյանն էլ խոստովանեց, որ վիճելի խնդրի վերաբերյալ նախարարությունը թատերական հանրությունից միայն ծիծաղելի կարծիքներ է ստացել:
ԳՈՀԱՐ ՀԱԿՈԲՅԱՆ
Կարդացեք նաև
«Առավոտ»
08.11.2016
