Տավուշի մարզի շատ բնակիչներ աշխատելու կամ այլ պատճառներով Ռուսաստան մեկնելիս ցանկանում են համոզվել՝ արդյոք այդ երկիր իրենց մուտքն ինչ-որ պատճառներով արգելվա՞ծ է: Նրանք ցանկանում են դա նախապես իմանալ, որպեսզի վրաց-ռուսական ցամաքային «Վերին Լարս» անցակետից իրենց ետ չուղարկեն:
Տավուշի մարզպետարանի աշխատակազմի տեղական ինքնակառավարման եւ հանրապետական գործադիր մարմինների հարցերով վարչությունն արդեն մեկ տարի բնակիչներին այդ հարցով օգնում է: Վարչության առաջատար մասնագետ Խանում Մարգարյանն ասաց, որ իրենց դիմած քաղաքացիների անձնագրային տվյալները վերցնելով՝ իրենք Ռուսաստանի դաշնային միգրացիոն ծառայության ինտերնետային կայքում ստուգում են՝ այդ ծառայությունն արգելափակե՞լ է տվյալ քաղաքացու մուտքը Ռուսաստան:
Խ. Մարգարյանի խոսքերով՝ Ռուսաստանի դաշնային միգրացիոն ծառայության կայքում մուտքի արգելքի բացակայությունը դեռ երաշխիք չէ, որ քաղաքացին ազատ կարող է ՌԴ մուտք գործել: Հնարավոր է, որ Հայաստանի քաղաքացու մուտքն արգելվի ՌԴ այլ ծառայության, օրինակ, ոստիկանության պահանջով, եթե տվյալ քաղաքացին ՌԴ տարածքում նախկինում ինչ-որ իրավախախտում է կատարել:
Ոսկան ՍԱՐԳՍՅԱՆ
