Էրեբունի եւ Նուբարաշեն վարչական շրջանների ընդհանուր իրավասության դատարանում այսօր շարունակվեց «Սարի թաղի գործով» քննությունը: Հիշեցնենք, որ Հարություն Թորոսյանին, Հրայր Իսախանյանին, Անդրանիկ Քյոսեյանին եւ Էդուարդ Զեյթունյանին մեղադրանք է առաջադրվել այն բանի համար, որ նրանք 19.07.2016-ին ժամը 20.00-ի սահմաններում, Երևան քաղաքի Մովսես Խորենացի փողոցին հարող` Գլինկա և Որմնադիրների փողոցների հատման վայրում մի խումբ անձանց հետ, առողջության համար վտանգավոր բռնություն են գործադրել իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ:
Այսօր շարունակվել է գործով տուժած ճանաչված ոստիկաններից մեկի հարցաքննությունը: «Նրա ցուցմունքում հիմնական ասելիք չկար, միայն ասում էր՝ «ոչ մի բան չեմ հիշում», «միայն հիշում եմ քարեր»: Պաշտպանական կողմի հարցերին տալիս էր անտրամաբանական պատասխաններ՝ «չեմ հիշում», «չեմ կարող ասել»: Նախաքննական ցուցմունքի հրապարակումից հետո նա ստիպված էր ընդունել՝ քարերը նետվել են, երբ ոստիկանների կողմից կրակոցներ են արձակվել»,-Aravot.am-ի հետ զրույցում ասաց Էդուարդ Զեյթունյանի եւ Հարություն Թորոսյանի պաշտպան, փաստաբան Լիպարիտ Սիմոնյանը:
Նա նշեց՝ իր պաշտպանյալները Սարի թաղի բնակիչներ են, որոնք դուրս էին եկել փողոց՝ իրենց կենցաղային հարցերը լուծելու նպատակով. «Չկան ապացույցներ, որ նրանք ոստիկանների հանդեպ բռնություն են գործադրել»:
Հավելենք, որ այս գործով հաջորդ դատական նիստը նշանակվել է հունվարի 23-ին՝ ժամը 12:00-ին:
Կարդացեք նաև
Լուիզա ՍՈՒՔԻԱՍՅԱՆ
Լուսանկարը՝ արխիվային
