«Դա Հայաստանի հետ կապ չունեցող զեկույց է»,-Aravot.am-ի հետ զրույցում ասաց Եվրոպայի խորհրդի խորհրդարանական վեհաժողովում (ԵԽԽՎ) հայկական պատվիրակության ղեկավար Հերմինե Նաղդալյանը:
Ինչպես արդեն տեղեկացրել ենք, ԵԽԽՎ-ում ձայների` 32 «կողմ», 96 «դեմ» հարաբերակցությամբ մերժվեց հայկական պատվիրակության առաջարկը վերանայել ուկրաինացի պատվիրակ Վոլոդիմիր Արիևի հեղինակած «Լրագրողների նկատմամբ հարձակումներն ու մամուլի ազատությունը Եվրոպայում» զեկույցի 9-րդ կետը, որում ամրագրված է. «Վեհաժողովը խորը մտահոգություն է հայտնում, որ մամուլի ազատության ապահովումը, ինչը սահմանված է նաև մարդու իրավունքների եվրոպական կոնվենցիայի 10-րդ հոդվածով, բացակայում է անդամ պետությունների այն տարածքներում, որոնք փաստացի վերահսկվում են անջատողական ռեժիմի կողմից, մասնավորապես Ադրբեջանի Լեռնային Ղարաբաղը, Վրաստանի Աբխազիան և Հարավային Օսեթիան, Մոլդովայի Տրանսնիստրիան: Ուստի հատուկ ուշադրություն է դարձվում այն հետաքննող լրագրողներին, որոնք հանդգնում են լույս գցել այդ բացարձակ մութ ու ոչ թափանցիկ և անօրեն տարածքների վրա»:
Զեկույցն ընդունվեց ձայների` 100 «կողմ» 15 «դեմ» հարաբերակցությամբ: Տիկին Նաղդալյանից հետաքրքրվեցինք` պատվիրակությունն ի՞նչ քայլեր էր ձեռնարկել նման ոչ հայանպաստ ձևակերպման ամրագրումը կանխելու համար: Նա պատասխանեց, որ պատվիրակությունը երեկ մինչև կեսգիշեր Արիևի և մյուս պատիրակների հետ քննարկումների մեջ է եղել, բազմաթիվ հակափաստարկներ են բերվել, ու նման քննարկումներ եղել են բոլոր քաղաքական խմբերում: Տիկին Նաղդալյանը վստահեցրեց, որ ընդունված զեկույցը կապ չունի Հայաստանի հետ. լինելով մամուլի ազատությանը նվիրված` դրանում որևէ քննադատություն չկա ուղղված Հայաստանին` հակառակ Թուրքիայի, Ադրբեջանի, անգամ Վրաստանի:
Խնդրահարույց ձևակերպման մասին տիկին Նաղդալյանն ասաց, որ այն կա ԵԽԽՎ փաստաթղթերում դեռ 2005-ից` 14/16 բանաձևում:
Կարդացեք նաև
Հերմինե Նաղդալյանի հետ հարցազրույցի մանրամասները` առաջիկայում:
Տաթև ՀԱՐՈՒԹՅՈՒՆՅԱՆ
