Փետրվարի 2-ին «Տեսակետ» մամուլի ակումբում գրականագետ Դավիթ Գասպարյանը և քանդակագործ Ֆերդինանդ Առաքելյանն անդրադարձան նախընտրական իրավիճակին, անսպասելի դաշինքների ստեղծմանը եւ քաղաքական դաշտում ընթացող փոփոխություններին:
Դավիթ Գասպարյանը նեղսրտեց. «25 տարի է՝ քանդում ենք մեր երկիրը, թալանում եւ տալիս ենք օտարին: Մեր իրականությունը նման է այն ֆուտբոլային խաղին, երբ Հայաստանի հավաքականը իր դաշտում 5:0 հաշվով պարտվեց Ռումինիայի հավաքականին: Ցավոք, երկրում բոլոր բնագավառներում է նույն վիճակը: Ուղղակի ֆուտբոլային խաղում պարտությունն 90 րոպե ձգվեց, երկրում պրոցեսը տեւական է»: Նրա ձեւակերպմամբ, այնքան ենք ընկել, որ ոգեւորությունը միայն ընտրությունից ընտրություն է գալիս, մեծ հաշվով, ժողովուրդն էլ ոչնչի չի հավատում:
Գրականագետն անդրադարձավ տարբեր պաշտոնյաների՝ պաշտոնը կորցնելուց հետո կուսակցությունից հեռանալուն: «Եթե կա կուսակցական նվիրվածություն, ուրեմն պաշտոնից ազատվելուց հետո ինչո՞ւ են կուսակցությունից դուրս գալիս, կամ հակառակ պրոցեսը՝ եթե իրար հետ են ու անստուգելի են, ուրեմն ինչո՞ւ են նույն՝ արդեն նախկին նախարարի կամ նախկին վարչապետի եղած-չեղածը հետո ստուգում….Սա բաց եւ դեմոկրատական հասարակության վիճակ չէ, ո՞ւր մնաց անկողմնակալությունը»,-տարակուսանք հայտնեց գրականագետը:
Կարդացեք նաև
Նա անդրադարձավ նաեւ ապրիլյան պատերազմին, ՊՊԾ գնդի գրավմանը, կարծիք հայտնեց, որ «Սասնա ծռերի» գործողություններից հետո է կառավարությունը փոխվել:
Դավիթ Գասպարյանը լավատես չէ, նա գտնում է, որ երկրի ներսում զարգացումները ցածրից բարձր չեն տանում, եւ մենք անկման մեջ ենք: Նրա ձեւակերպմամբ, վրիպումներ ունենք ոչ միայն ներքին քաղաքականության ոլորտում, այլեւ արտաքին. «Մեր արտաքին քաղաքականությունը պետք է սթափ լինի, միայն ցեղասպանություն ճանաչելը չէ, արտաքին քաղաքականության մեջ կորած-պրծած ենք»:
Գոհար ՀԱԿՈԲՅԱՆ