«Եթե վարչապետի այդ հայտարարությունն անկեղծության պոռթկում էր, ողջունելի է: Այդ հարցին պետք է պատասխանի Վիգեն Սարգսյանը, նա պարտավոր է պատասխանել եւ ասել՝ եղե՞լ է նման բան, ի՞նչ չափով, եւ որքա՞ն տեխնիկայի մասին է խոսքը: Փաստորեն, տեխնիկան դրա պատճառով դուրս չի եղել, երեխեքը մնացել են մենակ»,-«ԵԼՔ» դաշինքի միասնական շտաբում այսօր լրագրողների հետ զրույցում անդրադառնալով օրերս ԱԺ հարցուպատասխանի ժամանակ վարչապետ Կարեն Կարապետյանի՝ կերոսինի շուրջ հնչեցրած հայտարարությանը, ասաց դաշինքի կազմում ընդգրկված «Հանրապետություն» կուսակցության նախագահ Արամ Սարգսյանը:
Հիշեցնենք, որ ըստ վարչապետի՝ անորակ վառելիքի պատճառով ապրիլյան քառօրյայի ժամանակ զինտեխնիկան չի աշխատել:
Ըստ Արամ Սարգսյանի՝ բանակի գերագույն գլխավոր հրամանատարը եւս պետք է հարցի պատասխանը տա. «Եթե վարչապետն է ասում, նա ինչո՞ւ չի ասում»:
Արամ Սարգսյանը մեկնաբանեց նաեւ կարծիքը, թե վարչապետի հայտարարությունը Սեյրան Օհանյանին պատժելու համար է. «Դրա համար կարող է պատասխանատու լինել ցանկացած մարդ՝ ներառյալ վառելիքը ներկրողը, խառնողը…Բացարձակ նկատի չունեմ Սեյրան Օհանյանին: Եթե վարչապետը կեղծ հայտարարություն է արել՝ նրան մեղադրելու համար, չի կարելի այդպես»:
Կարդացեք նաև
«Լուսավոր Հայաստան» կուսակցության նախագահ, ԱԺ պատգամավոր Էդմոն Մարուքյանի խոսքով էլ՝ վարչապետի հայտարարությունը հաղորդում է հանցագործության մասին. «Պետք է հետաքննություն անցկացվի»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
