Այսօր Եռաբլուրում լրագրողների հետ զրույցում Երեւանի քաղաքապետ Տարոն Մարգարյանը, հարցին՝ ինչպե՞ս եք գնահատում ծեծուջարդի, դանակահարության դեպքերը, որ եղել են ՀՀԿ-ականների մասնակցությամբ՝ դեռ քարոզարշավը չսկսած՝ պատասխանեց, որ այդ բոլոր դեպքերի առումով մեկնաբանություններ եղել են ՀՀԿ պատասխանատուների կողմից: Հարուցված է քրեական գործ:
Հարցին՝ տարբեր վարչական շրջաններում տեսնում ենք, որ մարդկանց այս ընթացքում օգնություններ են բաժանում, այդ թվում Մալաթիա-Սեբաստիա համայնքում՝ քաղաքապետը պատասխանեց, որ վարչական շրջանների ղեկավարները որեւէ մեկն արձակուրդում չի գտնվում, բոլորն աշխատում են եւ պարտավոր են իրենց առօրյա աշխատանքը կատարել. «Ոչ միայն այս տարի, ամեն տարի իրենք իրենց աշխատանքն են կատարում, պարբերաբար ունենք հանձնաժողով, քաղաքացիները դիմում են, քննարկվում է հարցը, սոցիալապես անապահովներին միշտ էլ աջակցել ենք: Այնպես չէ, որ եթե քարոզարշավը սկսել է՝ քաղաքապետարանի կամ վարչական շրջանների աշխատակազմի դռները փակ են»:
Կարդացեք նաև
Լրագրողները հետաքրքրվեցին ԱԺ նախագահ Գալուստ Սահակյանի հարսի՝ մանկապարտեզի տնօրենի հետ կապված ձայնագրությունից, որն ուղղորդում էր եւ ՀՀԿ-ի համար ձայներ էր հավաքում: Քաղաքապետը պատասխանեց. «Ինձ թվում է՝ իրենց կողմից հայտարարությունը կատարվել է եւ դեռ մեր կրթության վարչության պետը ուսումնասիրում է»:
Հռիփսիմե ՋԵԲԵՋՅԱՆ
