Անցյալ տարվա ընթացքում «Անսահմանափակ շարժում» ծրագիրը պարերի, ներկայացումների և ֆիլմերի միջոցով ցուցադրեց, թե ինչի կարելի է հասնել սոցիալական ներառման շնորհիվ: Երեք փուլից բաղկացած ծրագիրը սկսեց 2016թ. հոկտեմբերին Գաֆեսչյան կենտրոնի դիմաց՝ պրոֆեսիոնալ և սիրողական պարողների ֆլեշմոբով, որոնցից ոմանք հաշմանդամություն ունեցող մարդիկ էին:
«Համախմբելով ֆիզիկական հաշմանդամություն ունեցող և չունեցող մարդկանց՝ մենք ամրապնդեցինք այն բարձունքները, որոնց կարող ենք հասնել, երբ ընդունենք և հարգենք մեկս մյուսին և միասին աշխատենք ներառական սկզբունքներով,» նշեց ԱՄՆ դեսպան Ռիչարդ Միլսը, ով մարտի 6-ին ընդունելություն կազմակերպեց «Անսահմանափակ շարժում» ծրագրի ավարտը նշելու կապակցությամբ:
«Անսահմանափակ շարժում» ծրագրի երկրորդ մասը կարճ վավերագրական ֆիլմ էր, որի պրեմիերան տեղի ունեցավ 2016թ-ի դեկտեմբերին Հայկական Բարեգործական Ընդհանուր Միությունում (AGBU): Ֆիլմը կենդանիների թերապիայի և ձիասպորտի «Կենտավր» ասոցիացիայի մասին է, որը տարածաշրջանում յուրահատուկ հաստատություն է և մասնագիտացած է հաշմանդամություն ունեցող մարդկանց՝ կենդանիների միջոցով թերապիա տրամադրելու մեջ:
Կարդացեք նաև
«Անսահմանափակ շարժում» ծրագրի վերջին մասը ներառական պարային ներկայացում էր, որը ցուցադրվեց փետրվարի 24-ին և 25-ին Գոյ թատրոնում: Նշված ներկայացման մեջ տարբեր կարողություններ ունեցող և տարբեր տարիքի պարողներ բեմում միասին ցուցադրեցին երկու մասից բաղկացած ներկայացում. առաջինը արդի հասարակության մեջ սոցիալական ներառման խնդրի շուրջ էր, երկրորդը՝ «Ալիսան հրաշքների աշխարհում» հրաշալի հեքիաթի ադապտացիան:
«Անսահմանափակ շարժում» ծրագիրը մշակել և իրականացրել են ամերիկյան փոխանակման ծրագրերի մի խումբ շրջանավարտներ: Ծրագրի իրականացումը հնարավոր է դարձել ԱՄՆ Պետդեպարտամենտի Շրջանավարտների ներգրավվածության և նորարության հիմնադրամի շնորհիվ: «Անսահմանափակ շարժում» խմբի անդամներն են Արինա Արարատյանը, Շողակաթ Գալստյանը և Արթուր Սահակյանը ՝ IVLP ծրագրի շրջանավարտներ, Ցոլակ Մլկե-Գալստյանը՝ Community Connections ծրագրի շրջանավարտ և Հայկ Վարդանյանը FLEX (Ապագա առաջնորդների փոխանակման ծրագիր) ծրագրից:
ԱՄՆ դեսպանը իր խոսքում շնորհավորեց ծրագրի կազմակերպիչներին և շնորհակալություն հայտնեց ծրագրի հանձնառության համար: Դեսպանը նաև քաջալերեց պարողներին, նրանց ծնողներին և ծրագրին աջակցող այլ անհատներին նրանց նվիրվածության համար:
ՀՀ-ում ԱՄՆ դեսպանատուն
