Aravot.am-ը համեմատել է սոցիոլոգ Ահարոն Ադիբեկյանի՝ ԱԺ ընտրությունների արդյունքների մասին արված հարցումների թվերը եւ ընտրությունների նախնական տվյալները:
Ընտրություններից առաջ Ահարոն Ադիբեկյանն ասել էր, որ ըստ իր հարցումների՝ քաղաքացիների 38 տոկոսը ձայնը տալու է ՀՀԿ-ին, մինչդեռ ըստ ԿԸՀ նախնական տվյալների՝ ՀՀԿ-ն հավաքել է 49.12%:
«Ծառուկյան» դաշինքն էլ, ըստ հարցումների, ստանալու էր 33%, մինչդեռ դաշինքին իր ձայնը վստահել է ընտրողների 27.32%-ը:
Պարոն Ադիբեկյանն ասել էր, որ «Օհանյան-Րաֆֆի Օսկանյան», «ԵԼՔ» դաշինքների և «Հայկական վերածնունդ» կուսակցության ձայները տատանվում են 2,5-5,5%-ի սահմաններում: «Օհանյան-Րաֆֆի-Օսկանյան» դաշինքի դեպքում կանխատեսումը գրեթե մոտ է արդյունքին՝ 2.07 %: «Հայկական վերածնունդ» կուսակցության դեպքում էլ կանխատեսումը ճիշտ է՝ 3.71 %: Իսկ ահա «ԵԼՔ» դաշինքի պարագայում արդյունքը գերազանցել է հարցումների թվերին՝ 7.77%:
Կարդացեք նաև
Սոցիոլոգը կարծիք էր հայտնել, որ «Ազատ դեմոկրատներ» կուսակցությունը և «Կոնգրես-ՀԺԿ» դաշինքը հնարավոր է՝ «ինչ-որ տեղ գրավեն», եթե ակտիվ լինեն: Ըստ հարցումների՝ մասնավորապես «Ազատ դեմոկրատներ»-ի օգտին կքվեարկեր ընտրողների 3-4 տոկոսը, իսկ «Կոնգրես-ՀԺԿ»-ի օգտին՝ 3-4 տոկոսը: Իրապես, «Ազատ դեմոկրատները» չհաղթահարեցին 5%-ի շեմը՝ ստանալով ՝ 0.94 % ձայներ, իսկ «Կոնգրես-ՀԺԿ» դաշինքը՝ 7%-ի շեմը՝ ստանալով՝ 1.65 %:
Ահարոն Ադիբեկյանը եւս մեկ կետով էր ճիշտ. ոչ մի քաղաքական ուժ 50+1% ձայն չհավաքեց: Ընդ որում, նախընտրական հարցումները նաեւ ցույց էին տվել, որ «Ծառուկյան» դաշինքը 1.5-2 տոկոս ձայներով գերազանցելու է ՀՀԿ-ին, բայց, ինչպես ասվեց, ՀՀԿ-ն գերազանցել է դաշինքին:
Ինչ վերաբերում է ՀՅԴ-ին, ապա Ադիբեկյանն ասել էր, թե վերջինս 5% կունենա, մինչդեռ ըստ ԿԸՀ նախնական տվյալների՝ «դաշնակներին» ձայն է տվել ընտրողների 6.60 %-ը:
Պատրաստեց Լուիզա ՍՈՒՔԻԱՍՅԱՆԸ
