«Ոսկե ծիրան» Երեւանի 14-րդ միջազգային կինոփառատոնի խաղարկային ժյուրիի նախագահն է շոտլանդական արմատներով բրիտանացի հանրահայտ ռեժիսոր, սցենարիստ, պրոդյուսեր եւ դերասան Հյու Հադսոնը: Նա բազմաթիվ մրցանակակիր ֆիլմերի հեղինակ է, որոնցից մի քանիսին անդրադարձ կարվի: Հադսոնի նման հսկայի ներկայությունը ցանկացած փառատոնի համար պատիվ է եւ փաստում է նշաձողի բարձրության մասին:
Հյու Հադսոնը հրաշալի կրթություն է ստացել, ծառայել անգամ արքայական բանակում, ուր նրան շնորհվել է լեյտենանտի կոչում: Հյու Հադսոնի առաջին կինը նկարչուհի Սյուզեն Միչին է, իսկ երկրորդ անգամ ամուսնացել է դերասանուհի Մերիամ դ’Աբոյի հետ: Երիտասարդ տարիներին Հադսոնը համագործակցել է անուն հանած այնպիսի ռեժիսորների հետ, որոնց թվում էին Ալան Փարկերը, Ռիդլին, Թոնի Սկոտը:
Նրա մուտքը մեծ կինո նշանավորվել է «Հրակառքեր» ֆիլմով, որը նկարահանվել է իրական դեպքերի հիման վրա և պատմում է երկու վազորդների մրցակցության մասին, որոնք ներկայացնում են Մեծ Բրիտանիան՝ 1924 թվականին Փարիզում անցկացվող Օլիմպիական խաղերի ժամանակ:
«Հրակառքերը» 1981-ին Կաննի կինոփառատոնի երկու մրցանակ է ստացել, 4 «Օսկար», այդ թվում` «Lավագույն ֆիլմ» անվանակարգում (1982), նաեւ BAFTA-ի 3 մրցանակ: Հաջորդը «Greystoke: The Legend of Tarzan» ֆիլմ էր, որի գլխավոր դերերում նկարահանվել են Քրիստոֆեր Լամբերտը եւ Էնդի ՄակԴաուելը: Այս ֆիլմ էլ արժանացել է BFI-ի եւ Cezar Awards-ի, ինչպես նաեւ ներկայացվել Վենետիկի կինոփառատոնի «Ոսկե առյուծ» մրցանակին:
Իսկ «Ես երազում էի Աֆրիկայի մասին» (2000) ֆիլմից հետո Հյու Հադսոնը որոշակի ընդմիջում հայտարարեց ռեժիսորական աշխատանքի առումով եւ սկսեց հանդես գալ իբրեւ հեղինակավոր փառատոների ժյուրիի անդամ:
2016-ին նա կրկին կինո վերադարձավ «Ալտամիրա» ֆիլմով, որի գլխավոր դերերում նկարահանվել են Անտոնիո Բանդերասը, Ռուպերտ Էվերետը եւ Կլեման Սիբոնին: Ֆիլմը պատմում է Մարսելինո Սանս դե Սաուտոլայի մասին, որը հայտնաբերել է Ալտամիրա քարանձավը ու ժամանակին արժանացել գիտական հանրության ծաղրուծանակին: Ի դեպ, Ալտամիրան ՅՈՒՆԵՍԿՕ-ի համաշխարհային ժառանգության հուշարձանների ցանկում է:
Պատրաստեց Գոհար ՀԱԿՈԲՅԱՆԸ
Հանդսոնը տիկնոջ` Մերիամ դ’Աբոյի հետ
Լուսանկարները` telegraph.co.uk, zimbio.com, pinterest.com, dvdtalk.com կայքերից: