Երեւանի կենտրոնում գտնվող Կենտրոնական հանրախանութը կամ, այսպես կոչված, «Մանկական աշխարհը» ժամանակին նախագծել են Արսեն Ահարոնյանը, Հովհաննես Մարգարյանը, Միքայել Մազմանյանը եւ Գեւորգ Քոչարը: Շենքը բացվել է 1937թ.: «Մանկական աշխարհի» հետ շատերը գունեղ մանկական հիշողություններ ունեն, իսկ մեծերն ասում են, որ այս շենքի պահեստում ժամանակին ապրել է նաեւ ծաղկավաճառ Կարա Բալան: Այժմ հանրախանութը փակ է, որոշ տեղեկություններով՝ այն սեփականաշնորհվել է Ռուսաստանի հայերի միության նախագահ Արա Աբրահամյանի կողմից, որի ներկայացուցիչների հետ կապ հաստատել չհաջողվեց: «Մանկական աշխարհն» այսօր քաղաքի կենտրոնում ծվարած ուրվականի է նման: ՀՀ կառավարությանն առընթեր պետական գույքի կառավարման վարչությունից «Առավոտին» տեղեկացրին, որ «Մանկական աշխարհ» հանրախանութի մասնավորեցման գործարքը վարչության կողմից չի իրականացվել, հետեւաբար վարչությունը վերջինիս վերաբերյալ տեղեկատվությանը չի տիրապետում:
Լուսանկարը՝
ԳՈՀԱՐ ՀԱԿՈԲՅԱՆԻ
«Առավոտ»
07.07.2017
