Սրտամկանի ինֆարկտը սիրտը սնող արյան (պսակաձեւ) անոթների խցանման հետեւանքով առաջացող սուր անբավարարությունն է, որի արդյունքում առաջանում է սրտամկանի մեռուկացում (իշեմիկ նեւրոզ)։ Սրտամկանի ինֆարկտի կլինիկական նշանների վաղ հայտնաբերումը վճռորոշ է հիվանդների համար։
Տիպիկ ախտանշաններն են.
Կրծքավանդակում ճնշող, այրող բութ ցավ, որը կարող է ճառագայթել դեպի ձախ ուսը, ձախ ձեռքը, թիկունքը եւ ստորին ծնոտը։
Ցավը տեւում է 20 րոպեից ավելի եւ չի անցնում նիտրոգլիցերինի ընդունումից հետո։
Դեպքերի 20-40%-ում կարող է ցավ չլինել, այլ լինեն նախազգուշացնող ախտանշաններ։ Առանց ցավի ընթացող ինֆարկտը հաճախ լինում է շաքարախտով հիվանդների եւ ծերերի մոտ։
Նախազգուշացնող ախտանշաններն են
Ծանրության՝ ճնշման զգացում կրծքավանդակում,
Թուլություն, գունատություն, սառը քրտինք,
Սրտխառնոց եւ փսխում,
Տհաճ զգացում, անհարմարավետություն (դիսկոմֆորտ) մարսողական խանգարումներով եւ զկռտոցներով։
Վատ բանի նախազգացում կամ վախ։
Զանգահարեք շտապօգնություն կամ խնդրեք որեւէ մեկին զանգահարի։
Առաջին օգնություն
Պառկեցրեք հիվանդին, օգնեք նրան ընդունել հարմար դիրք։ Եթե հիվանդը ունի բժշկի կողմից նշանակված դեղորայք, ապա օգնեք նրան ընդունել այդ դեղորայքը։ Վստահեցրեք տուժածին, որ բուժօգնությունը ճանապարհին է եւ շուտով տեղ կհասնի։
Արձակեք սեղմող հագուստները, հիվանդին պահեք հանգիստ, սակայն խուսափեք ֆիզիկական ուժ գործադրելուց։ Սրտամկանի ինֆարկտով հիվանդը պետք է տեղափոխվի հիվանդանոց շտապօգնության մեքենայով (ոչ թե հարազատի կամ ընկերոջ մեքենայով)։
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
13.07.2017
