Վրաստանի նախկին նախագահ, Օդեսայի նախկին նահանգապետ Միխեիլ Սաակաշվիլին մեծ թվով համախոհներով հատել է Ուկրաինայի սահմանը «Շեգինի» անցակետով: Այս մասին գրում է meduaza.io-ն:
Սաակաշվիլիի համախոհներն օղակի մեջ են վերցրել նրան և ճեղքել սահմանապահների գիծը: Սահմանապահները որևէ պատասխան միջոց չեն ձեռնարկել, իսկ Սաակաշվիլիի օգնականները սկսել են ծափահարել, աղաղակել և երգել Ուկրաինայի հիմնը:
https://www.youtube.com/watch?v=-y3zfR-XUgI
Ուկրաինայի ներքին գործերի նախարարությունից հայտնել են, որ մի քանի սահմանապահներ վնասվածքներ են ստացել Սաակաշվիլիի համախոհների հետ տեղի ունեցած բախման հետևանքով: Ըստ ՆԳՆ տվյալների՝ Սաակաշվիլիի շուրջ հավաքված ամբոխը նրանց տապալել է գետնին: Տուժածների մոտ ախտորոշվել են գլխի և կրծքավանդակի վնասվածքներ, այնուամենայնիվ հիվանդանոցային բուժում չի պահանջվել:
https://www.youtube.com/watch?v=EqRCgsiKDm0
Ուկրաինայի գլխավոր դատախազ Յուրի Լուցենկոն խոստացել է քրեական պատասխանատվության ենթարկել «նրանց, ովքեր կազմակերպել են անօրինական կերպով սահմանահատումը, ղեկավարել այդ գործողությունները կամ նպաստել խորհուրդներով կամ գործողություններով»:
«Իշխանության համար պայքարելով՝ Սաակաշվիլիի համախոհները ոչնչացնում են պետությունը: Ով համաձայն չէ՝ փորձեք հատել վրացական կամ բրիտանական սահմանը»,- գրել է Լուցենկոն Facebook-ի իր էջում:
Ավելի ուշ ՆԳՆ-ից հայտարարել են, որ հարուցվել է քրեական գործ Ուկրաինայի ՔրՕր 332 հոդվածով՝ «Պետական սահմանով անօրինական անձանց տեղափոխում»:
Այդ հոդվածով սահմանվում է մինչև 5 տարվա ազատազրկում՝ հանցանքն իրագործելու պահին օգտագործված տրանսպորտային միջոցների առգրավմամբ:
Երկրի ներքին գործերի նախարար Արսեն Ավակովը խոստացել է պատասխանատվության ենթարկել միջադեպի բոլոր մեղավորներին: Նրա խոսքով՝ Սաակաշվիլիին հաջողվել է անցնել սահմանը, քանի որ իրավապահներին կարգադրված էր ուժային մեթոդներ չկիրառել:
Ավելի վաղ Ուկրաինայի նախագահ Պյոտր Պորոշենկոն, մեկնաբանելով Սաաակաշվիլիի հնարավոր վերադարձը, ասել էր, որ նրա կողմից սահմանի հատումը սահմանապահների և միգրացիոն ծառայության կողմից կընկալվի այնպես, ինչպես որ նման գործողությունների դիմող այլ անձանց դեպքում:
Պատրաստեց՝ Վիկտորյա ԱՆԴՐԵԱՍՅԱՆԸ
