2015 թվականին Վազգեն Սարգսյանի անվան ռազմական համալսարանի կուրսանտ Հայկազ Բարսեղյանին առանձնակի դաժանությամբ խուլիգանական դրդումներով սպանելու գործով նիստն այսօր հետաձգվեց երկու շաբաթով:
Ամբաստանյալ Վաչե Սահակյանի պաշտպան Արմեն Նադիրյանը դատարանին տեղեկացրել էր, որ ինքը դադարեցնում է իր փաստաբանական գործունեությունը՝ նոր աշխատանք գտնելու պատճառով: Դատարանը Վաչե Սահակյանին կարգադրեց նոր փաստաբան ընտրելու դեպքում դատարանին տեղեկացնել եւ երկու շաբաթ էլ հնարավորություն տվեց նրա նոր փաստաբանին գործին ծանոթանալու համար:
Հիշեցնենք, որ Հայկազ Բարսեղյանի սպանության գործով մեղադրանք է առաջադրվել նրա համակուրսեցիներ Գնել Թևոսյանին, Նորիկ Սահակյանին, Վաչե Սահակյանին և Մովսես Ազարյանին ՝ 2015թ. հունվարի 29-ին, ժամը 02:00-ից 03:00-ի սահմաններում, ՀՀ ՊՆ 24236 զորամասի առաջին գումարտակի առաջին մարտկոցի թիվ 408 ննջարանում առանձնակի դաժանությամբ ու խուլիգանական դրդումներով Հայկազ Բարսեղյանին սպանելու համար:
Արփինե ՍԻՄՈՆՅԱՆ
