Ուկրաինայի նախագահ Պյոտր Պորոշենկոն հանցագործություն է համարել Օդեսայի նախկին նահանգապետ Միխեիլ Սաակաշվիլիի կողմից լեհ-ուկրաինական սահմանի հատումը, քանի որ խախտվել է պետական սահմանի անձեռնմխելիության սահմանադրական սկզբունքը: Այս մասին հաղորդում է ՈՒՆԻԱՆ-ը:
«Կատարվել է հանցագործություն, որովհետև գոյություն ունի պետական սահմանի անխախտելիության սահմանադրական սկզբունք: Դա պետության ազգային անվտանգության հարց է, և ինձ համար միևնույն է՝ ով է խախտում պետական սահմանը՝ արևելքի զինյալները, թե արևմուտքի քաղաքական գործիչները, պետք է լինի բացարձակ հստակ և իրավական պատասխանատվություն»,- ասել է Պորոշենկոն:
Պորոշենկոյի կարծիքով՝ խնդիրը որևէ քաղաքական մեկնաբանության կարիք չունի: «Մենք պետք է մեկնաբանենք և կմեկնաբանենք այդ հարցը բացառապես իրավական հարթակում,- ասել է նա:- Ինձ համար միևնույն է՝ ով է խախտում պետական սահմանը. դրա համար պետք է լինի պատասխանատվություն՝ համաձայն ուկրաինական օրենսդրության»:
Պատրաստեց՝ Վիկտորյա ԱՆԴՐԵԱՍՅԱՆԸ
