«Ամեն երկիր ունի իր չափման համակարգը եւ հնարավոր չէ միավորել մի միության մեջ ու տվյալ երկրի վզին փաթաթել այդ համակարգը, չի կարող նման բան լինել, բայց պետք է չափումների արդյունքները համադրելի դարձնել»,-այսօր տնտեսական զարգացման եւ ներդրումների նախարարության Շուկայի վերահսկողության տեսչական մարմնի կազմակերպած համաժողովի ժամանակ ասաց Եվրասիական տնտեսական հանձնաժողովի (ԵՏՀ) Տեխնիկական կանոնակարգման եւ հավաստագրման բաժնի ներկայացուցիչ, փորձագետ Նինա Վլադիմիրովնան: Փորձագետը ներկայացրեց տեխնիկական կանոնակարգման համակարգը ԵՏՄ-ում` նշելով, որ առանց այդ կանոնակարգերը համադրելի դարձնելու հնարավոր չէ միության անդամ երկրների մեջ մարդկանց առողջության համար անվտանգ առեւտուր:
«Երկրները, որոնք հավաքվել են մեկ միությունում առեւտուր անելու, պետք է ունենան մեկ միասնական համակարգեր»,-ասաց փորձագետը:
Շուկայի վերահսկողության տեսչական մարմնի ղեկավար Լեւոն Խալիկյանի խոսքով, ԵԱՏՄ-ի կողմից ընդունվել են տեխնիկական կանոնակարգերը, որոնց համաձայն՝ տնտեսվարողները պարտավոր են ունենալ համապատասխան սերտիֆիկատ, հայերեն մակնշում` հակառակ դեպքում նրանց ապրանքը շուկայից կհանվի: Ըստ պարոն Խալիկյանի, ԵԱՏՄ անդամ երկրների համար գործում են նոր չափորոշիչներ, որոնք ընդունվել են Եվրասիական տնտեսական հանձնաժողովի կողմից եւ անդամ երկրները պարտավոր են ապահովել դրանց կիրարկումը:
Նրա խոսքերով՝ այսօրվա սեմինարի նպատակն է ներկայացնել չափումների միասնականության ապահովման տվյալների փոխադարձ ներկայացման կարգը, չափագիտական վկայագրման մեթոդաբանության կարգը, ինչպես նաեւ ԵՏՀ-ի կողմից հաստատված փաստաթղթերի կիրառման հետ կապված հարցեր, չափումների միջոցների տեսակի հաստատման եւ չափումների միասնության ապահովման աշխատանքների փոխադարձ ճանաչման միասնական կարգերը:
Մանրամասները` տեսանյութում
Լուսինե ԲՈՒԴԱՂՅԱՆ
