«Սիրիայում առայժմ հաջողվում է խուսափել ռուսական ու ամերիկյան զինուժերի ուղղակի առճակատումից: Երկու երկրներն էլ լուրջ են տրամադրված եւ ամեն ինչ անում են, որ աշխարհին սպառնացող նոր վտանգը դուրս չգա Սիրիայից»,-«Հայելի» մամուլի ակումբում այսօր լրագրողների հետ հանդիպմանը վերլուծելով իրավիճակը Սիրիայում, ասաց թուրքագետ, արեւելագետ Ռուբեն Սաֆրաստյանը:
Նա ընդգծեց, որ Աֆրին քաղաք ներխուժած Թուրքիան շարունակում է Սիրիայի դեմ ռազմական ագրեսիան՝ գործողությունների շրջանակներն ընդլայնելով ԱՄՆ-ի եւ Ռուսաստանի աջակցության շնորհիվ:
«Թուրքիան, ըստ էության, սկսում է պահանջներ ու վերջնագրեր ներկայացնել նաեւ Սիրիայի այլ տարածքների, օրինակ՝ Մամբիջ բնակավայրի նկատմամբ: Պահանջում է, որ քրդական ուժերը լքեն այն: Կարելի է ասել, որ սա վերջնագիր է: Ու, կարծես թե, այդ հարցում համաձայնություն կա ԱՄՆ-ի հետ, որն ընդունել է Թուրքիայի այդ տեսակետը: Եթե դա տեղի չունենա, Թուրքիան սպառնում է այստեղ եւս սկսել ռազմական գործողություններ»,-տեղեկացրեց փորձագետը:
Անդրադառնալով ԱՄՆ նախագահ Դոնալդ Թրամփի վերջին հայտարարությանը, թե ամերիկյան զինուժը դուրս է գալու Սիրիայից, Ռուբեն Սաֆրաստյանը նշեց. «ԱՄՆ-ն մինչ օրս չունի քաղաքական գիծ Սիրիայի հանդեպ: Փնտրտուքների մեջ է, վերջնական չի որոշել, թե Սիրիայում ինչ կարգավիճակով է մնալու՝ շարունակելո՞ւ է քրդերին աջակցել, թե հերթական անգամ լքելու է նրանց»:
Լուիզա ՍՈՒՔԻԱՍՅԱՆ
