Ռուսասատնի 90 քաղաքներում ընթացող «Նա մեր ցարը չէ» կարգախոսով բողոքի ցույցերի ժամանակ բազմաթիվ ցուցարարներն են բերման ենթարկվել: Այս մասին հայտնում են ռուսական լրատվամիջոցները: Մասնավորապես՝ «Ազատություն» ռադիոկայանի ռուսական ծառայության փոխանցմամբ՝ ռուսական իրավապաշտպան կազմակերպություններից մեկի՝ տվյալներով հակակառավարական ցույցերի 600-ից ավելի մասնակիցներ են բերման ենթարկվել: Ցույցերը մեկնարկել են ՌԴ արդեն 4-րդ անգամ նախագահ դարձող Վլադիմիր Պուտինի ՝ մայիսի 7-ի երդմնակալությանն ընդառաջ:
Առավել մեծ թվով մարդիկ են բերման ենթարկվել Մոսկվայում եւ Չելյաբինսկում, տասնյակներով՝ Յակուտսկում, Կրասնոյարսկում, Կրասնոդարում, Կալուգայում եւ Նովոկուզնեցկում: Իսկ Սարատովում, ըստ նույն աղբյուրի, չարտոնված ցույցի ժամանակ նաեւ երեխայի են բերման ենթարկել:
Ցույցերը կազմակերպել է ռուս ընդդիմադիր գործիչ Ալեքսեյ Նավալնին: Շատ քաղաքներում ռուսական իշխանություններն այս ցույցերի անցկացման համար թույլտվություն չեն տվել:
Հիշեցնենք, որ ժամեր առաջ, ըստ TVrain-ի, Մոսկվայի Պուշկինսկի հրապարակից ոստիկանները նաեւ Ալեքսեյ Նավալնիին բերման են ենթարկել: Ցուցարարները վանկարկում են՝ «Մենք չենք հանձնվի, մենք ուզում ենք ազատ ապրել: Պուտինը գող է, մենք դեմ ենք կոռուպցիային»:
Հիշեցնենք նաեւ Մոսկվայի կենտրոնում ցուցարարները փողոցներ են փակում, թեեւ ոստիկանները բռնի ուժ է կիրառում, ռուսական ՕՄՕՆ-ն է գործի անցել, ցուցարարներին հրելով փորձում են հետ մղել:
Մոտ մեկ ժամ առաջ Մոսկվայի Պուշկինի հրապարակում ՕՄՕՆ-ը ցրեց բազմահազարանոց ցույցը, սակայն ցուցարարների մեծ խումբը տեղափոխվել է հարակից տարածքներ:
Ցուցարարներից ոմանք ասում են՝ «Ուզում ենք ինչպես Հայաստանում: Հայերն ապացուցեին, որ ժողովուրդը կարող է իշխանություն փոխել»: Ցուցարարներից մեկն էլ՝ հարցին՝ չե՞ք վախենում բերման ենթարկվել, պատասխանեց.«Եթե մենք վարվենք այնպես, ինչպես հայերը, բոլորին չեն կարող բերման ենթարկել»:
Պատրաստեց՝ Նելլի ԲԱԲԱՅԱՆԸ
Լուսանկարը՝ «Ազատություն» ռադիոկայանի ռուսական ծառայության
