ՀՀ Սահմանադրական դատարանի նախագահ Հրայր Թովմասյանն այսօր լրագրողների հետ զրույցում ասաց, որ հրաժարական չի տալու: Ապա չհամաձայնեց լրագրողի դիտարկմանը, թե երկրում սահմանադրական փակուղի է, որի պատճառով էլ՝ քաղաքական ճգնաժամ: «Այն Սահմանադրությունը, որի կերտմանը ես մասնակցել եմ, արժանացել է թե տեղի, եւ թե միջազգային հեղինակավոր կազմակերպությունների բարձր գնահատականին»,-նշեց Հրայր Թովմասյանը՝ անհամաձայնություն հայտնելով այն տեսակետների առնչությամբ, թե նոր Սահմանադրությունը նախկին իշխանությունների համար է գրվել:
Նորընտիր վարչապետ Նիկոլ Փաշինյանի հետ գործակցության մասին հարցին էլ Թովմասյանը պատասխանեց, որ ՍԴ-ն քաղաքական կառույց չէ եւ որեւէ քաղաքական ուժի հետ չի գործակցում:
Ապա լրագրողները հետաքրքրվեցին, թե ՍԴ նախագահն ինչ կարծիքի է փաստաբան Վահե Գրիգորյանի՝ ՍԴ անդամի պաշտոնում հնարավոր առաջադրման մասին: «Ես այդ պաշտոնում տեսնում եմ յուրաքանչյուրին, որը կստանա ԱԺ պատգամավորների առնվազն 3/5-ի աջակցությունը: Որպես ՍԴ նախագահ՝ ես ոչ մի ազդեցության լծակ չունեմ այն հարցում, թե ով պետք է դառնա ՍԴ դատավոր»:
Լուիզա ՍՈՒՔԻԱՍՅԱՆ
