Հայաստանի և Ադրբեջանի միջև Լեռնային Ղարաբաղի շուրջ բանակցություններն անցկացվել են, անցկացվում են և կանցկացվեն: Այս մասին հայտարարել է Ադրբեջանի նախագահ Իլհամ Ալիևը՝ ելույթ ունենալով կառավարության նիստում:
«Այս տարի մենք ձեռնարկեցինք հերթական լուրջ քայլը՝ ուղղված Եվրոպական միության հետ կապերի զարգացմանը: Այս տարվա ամռանը Եվրամիության և Ադրբեջանի միջև ստորագրվեց «Գործընկերության առաջնահերթությունները» փաստաթուղթը, և ես կարծում եմ, որ դա շատ կարևոր քայլ է, կարևոր փաստաթուղթ: Դրանում արտացոլվել են բազմաթիվ կարևոր հարցեր: Այդ թվում, փաստաթղթում դրույթներ կան՝ նվիրված Լեռնային Ղարաբաղի հակամարտության շուրջ հայ-ադրբեջանական կարգավորմանը, որոնք արդարացիորեն, լիարժեք կերպով արտահայտում են մեր դիրքերն ու շահերը: Փաստաթղթում նշված է, որ Եվրամիությունն աջակցում է Ադրբեջանի ինքնիշխանությունը, սահմանների անձեռնմխելիությունը և տարածքային ամբողջականությունը: Միաժամանակ, ՆԱՏՕ-ի գագաթնաժողովի արդյունքում ընդունված հռչակագիրը ևս մեկ անգամ աջակցություն է հայտնում Ադրբեջանի տարածքային ամբողջականությանը:
Ալիևը հերթական անգամ մեղադրել է հայկական կողմին բանակցային գործընթացը տապալելու և դրա ձևաչափը փոխելու փորձերի մեջ՝ ընդգծելով, որ հակամարտությունը մոտ ժամանակներում պետք է լուծվի «միջազգային իրավունքի նորմերի և սկզբունքների հիման վրա, հօգուտ երկրի տարածքային ամբողջականության»:
«Ուստի մենք շարունակում ենք մնալ մեր սկզբունքային դիրքերում: Հույս ունեմ, որ Հայաստանի նոր ղեկավարությունը իր քաղաքականության մեջ կցուցաբերի կառուցողականություն»,- ասել է Ալիևը՝ հույս հայտնելով, որ մոտ ժամանակներում ադրբեջանական հողերը «կազատագրվեն օկուպանտներից»:
Պատրաստեց՝ Վիկտորյա ԱՆԴՐԵԱՍՅԱՆԸ
