«Նախագահն ունի նման իրավունք, բայց փոքր-ինչ անարդարության զգացում կա մթնոլորտում»,-լրագրողների հետ զրույցում այսօր անդրադառնալով ՀՀ նախագահ Արմեն Սարգսյանի կողմից Սահմանադրական դատարանի անդամի պաշտոնում Գոռ Հովհաննիսյանի թեկնածության առաջադրմանը, ասաց «Իմ քայլը» խմբակցության պատգամավոր, փաստաբան Նիկոլայ Բաղդասարյանը:
Նա անարդարության մթնոլորտի առկայությունն այսպես բացատրեց՝ նախկինում, երբ ՍԴ անդամի պաշտոնում առաջադրվել էր փաստաբան Վահե Գրիգորյանի թեկնածությունը, այն չընդունվեց՝ ԱԺ-ում քվորում չլինելու պատճառով: «Այսինքն, նախագահն արտահայտել է իր կամքը, սակայն ԱԺ-ն չի արձագանքել նշյալ պատճառով: Նախագահն իրավունք ուներ եւս մեկ անգամ նույն թեկնածուին պնդելու»,-համոզմունք հայտնեց Նիկոլայ Բաղդասարյանը:
Հիշեցնենք, որ հարցն առաջիկայում ԱԺ-ում կդրվի քվեարկության: Բաղդասարյանը հավելեց, որ Վահե Գրիգորյանին եւ Գոռ Հովհաննիսյանին անձամբ ճանաչում է եւ նրանց գիտելիքները բարձր է գնահատում:
Իսկ թե ինչպես է քվեարկելու «Իմ քայլը» խմբակցությունը Հովհաննիսյանի թեկնածությանը, պատգամավորը նախընտրեց չպատասխանել:
Կարդացեք նաև
Լուիզա ՍՈՒՔԻԱՍՅԱՆ
