«Ծանր օրեր են եղել, իմացել, գնացել իրենց կողքն եմ կանգնել, մինչև իմ հիվանդությունը ձեռք բերելը: Դրանից հետո իրավահաջորդ դարձել է կինը»,- Երևանի ընդհանուր իրավասության դատարանի Շենգավիթի նստավայրում «Սասնա ծռերի» գործով դատական նիստին հայտարարեց սպանված ոստիկան Յուրի Տեփանոսյանի իրավահաջորդ Տիգրան Գրիգորյանը: Նա ներկայացավ՝ ընտանիքի քավորն է, նաև մասնակցել է Յուրի Տեփանոսյանի դիակի դատաբժշկական փորձաքննությանը:
Այդ գործընթացի վերաբերյալ նա ներկայացրեց որոշ մանրամասներ. «Ես գնացել եմ, դիահերձմանը մասնակցել եմ, իմ սրտով, հոր ասելով, որ ինքը պետք է հավատար ինձ: Իմ աչքի առաջ Յուրի Տեփանոսյանին մերկացրել են. տեսել եմ, որ իր վրա ոչ մի հետք չի եղել, գլուխը բացելուց հետո լեզվի մեջից հանել են փամփուշտը: Կարմիր սանտիմետրի վրա չափել են գնդակը, իմ ներկայությամբ գրել են: Դա լրիվ լուսանկարված է»:
Մեղադրող Պետրոսյանը հարցրեց՝ Յուրի Տեփանոսյանի ծառայության վերաբերյալ մանրամասներ ունե՞ք, նա պատասխանեց՝ ուրախ գնացել, ուրախ հետ է եկել, ծառայել է ներքին զորքերում, ոչ մի հարցով ինձ չի դիմել:
Նա նշեց, որ սպանությունը տեղի է ունեցել հուլիսի 30-ին՝ 2016 թվականին՝ ժամը 16.30-17.00: Իսկ թե ինչպե՞ս է սպանվել Յուրի Տեփանոսյանը, Տիգրան Գրիգորյանը պատասխանեց. «Տեղեկություն ունեին, որ սնայպերը վերևից խփել է, այնտեղ այդպես էին խոսում, մի քիչ ուշ եմ գնացել, կանգնել եմ մոր, հարսի կողքին»:
Կարդացեք նաև
Հարցին՝ այն տեսակետներին, որ հայտնում է Յուրի Տեփանոսյանի հայրը, համաձա՞յն է, Տիգրան Գրիգորյանը պատասխանեց. «Ես թույլ չէի տալիս իմ ներկայությամբ նման խոսակցություններ: Իմ տեսակետը կարող եմ ասել: Ինքը մի քիչ հիվանդացել է. որդի կորցնելը՝ 30 տարեկան, շատ դժվար բան է: Դեպքից մեկ տարի հետո հայրը սկսեց հայտարարել, որ իր որդուն սպանել են ոստիկանները, ոչ թե «Սասնա ծռերը»:
Պավել Մանուկյանը հարցրեց՝ «Տիգրան ջան, դու զենքից պատկերացում ունե՞ս, կարող ես ասել քո տեսածը SKS տեսակի զենք է՞ր, թե՞ դրակունով զենքը»: Նա պատասխանեց. «Ես փորձագետ չեմ: Իմ աչքի առաջ փամփուշտը չափել են. տրամագիծը եղել է 7.62: Որ տեսնեմ, իրարից կտարբերեմ»:
Դատարանն անցավ տուժողի մյուս իրավահաջորդների հարցաքննությանը: Հարցաքննվեց Արփինե Թումասյանը:
Տաթև ՀԱՐՈՒԹՅՈՒՆՅԱՆ
