Հուլիսի 8-ին «Ոսկե ծիրանի» շրջանակում բացվեց «Հայացք Լեհաստանին» ծրագիրը: «Ոսկե ծիրանի» հիմնադիրներից Սուսանա Հարությունյանը նշեց, որ ծրագիրը չէր իրականանա, եթե չլիներ Ադամ Միցկեւիչի ինստիտուտի եւ Հայաստանում Լեհաստանի դեսպանատան հետ համագործակցությունը: Ծրագիրը բացվեց լեհական կինոյի վարպետներից մեկի՝ Վոյցեխ Հասի «Կլեփսիդրայի առողջարան» ֆիլմով, որը Մարտին Սկորսեզեն որակել է որպես համաշխարհային կինոյի ադամանդներից մեկը:
«Կլեփսիդրայի առողջարանում» նկարահանվել է լեգենդար դերասան, երաժիշտ, գրող Յան Նովիցկին, որը Հայաստանում Լեհաստանի դեսպանատան ներկայացուցիչ Մարեկ Ռեսզուտայի բնորոշմամբ Լեհաստանում համարվում է ազգային արժեք ու 250 ստեղծագործության հեղինակ է:
Նովիցկին ասաց, որ առաջին անգամ է Հայաստանում. «Մինչ այս պահը Հայաստանը գիտեի միայն կոնյակով: Դեսպանության աշխատակիցը նշեց, որ ես 250 ֆիլմերի ստեղծմանն եմ մասնակցել, 200-ը կարելի է մի կողմ դնել, բայց 50-ի մասին կարելի է մտածել: Եվ եթե անգամ միայն «Կլեփսիդրայի առողջարանը» դիտարկենք, ապա կհամարեմ, որ իմ կյանքն իմաստ է ունեցել»,-ասաց Նովիցկին: Նա նշեց, որ «Կլեփսիդրայի առողջարան» ֆիլմի ստեղծագործական կազմի մեծ մասն այլեւս ողջ չէ, եւ ֆիլմի ցուցադրությունը լինելու է յուրատեսակ հրաժեշտի ծես նրանց համար:
Կարդացեք նաև
«Ոսկե ծիրանի» կազմակերպիչները Յան Նովիցկուն՝ կինոյում ունեցած ավանդի համար Փարաջանովյան թալեր շնորհեցին:
Գոհար ՀԱԿՈԲՅԱՆ
Հայաստանը, ոչ թե կոնյակով, այլ իր ժողովրդի տված արժեքներով՝ Այվազովսկիով, Խաչատրյանով, Ազնավուրով, Համբարձումյանով և նմանատիպ մեծություններով պետք է ճանաչել … Հարգանքով՝ Աշոտ Բաբայան