Հայաստանի պետական տնտեսագիտական համալսարանի (ՀՊՏՀ) ազատված դասախոսների շահերը ներկայացնող փաստաբան Ալեքսանդր Կոչուբաեւը ֆեյսբուքի իր էջում տեղեկացրել է, որ Երեւան քաղաքի դատախազ Գեւորգ Բաղդասարյանին հաղորդում է ներկայացրել ՀՊՏՀ ռեկտորի պաշտոնակատար Ռուբեն Հայրապետյանի կողմից՝ ՀՀ Քրեական օրենսգրքի մի շարք հոդվածներով նախատեսված հանցանքների կատարման հիմքով: Նա նաեւ պնդում է, որ ՀՊՏՀ-ն այլեւս չունի ռեկտոր:
Aravot.am-ը այս մասին մեկնաբանություն խնդրեց ՀՊՏՀ ռեկտորի պաշտոնակատար Ռուբեն Հայրապետյանից:
«Նախարարի հրամանով նշանակվել եմ ռեկտորի պաշտոնակատար մինչև օրենսդրությամբ սահմանված կարգով ռեկտորի ընտրությունը և նշանակումը։ Ինչպես կարող եք նկատել, ռեկտորի ընտրությունը և նշանակումը դեռևս չի կատարվել։ Ակնհայտ է, որ ՀՀ օրենսդրությունը չի սահմանափակվում կառավարության վերոնշյալ որոշմամբ։ Համալսարանն այժմ վերակազմավորման փուլում է՝ ՊՈԱԿ-ից հիմնադրամ։ Իսկ «հանցագործության» մասին խոսելն այնքան զավեշտալի է, որ թույլ տվեք ավելորդ ժամանակ չվատնել անլուրջ զրույցների վրա»,- ասաց Ռուբեն Հայրապետյանը:
Կրթության, գիտության, մշակույթի եւ սպորտի նախարարի մամուլի խոսնակ Անժելա Կժդրյանի հետ էլ կապվեցինք, ասաց, որ թեմայի վերաբերյալ նախարարության տեսակետը կներկայացնի երկուշաբթի օրը:
Կարդացեք նաև
Գոհար ՀԱԿՈԲՅԱՆ
