«Շենքի գորգերն էլ են երբեմն մաքրվում, իսկ թե ինչպես են կազմակերպվում, դրան ես չեմ մասնակցում»,-այսօր կառավարության նիստից հետո ասաց Ֆինանսների նախարար Ատոմ Ջանջուղազյանը՝ անդրադառնալով Վարդավառի օրը 5 միլիոն դրամով ԱԺ գորգերը լվանալու միջոցառմանը:
Ըստ պարոն Ջանջուղազյանի, այդ մաքրումը՝ որպես առանձին ծախս, նախատեսված չէ: Նա դժվարացավ այդ ծախսին գնահատական տալ. «Ծախսերը կատարվում են նախատեսվածի շրջանակում: Ես՝ որպես նախարարության ներկայացուցիչ, կարծում եմ, որ մեր նպատակը պետք է լինի, որ այդ ծախսերը իրականացվեն՝ բոլոր կանոնները պահպանելով: Եթե պահպանվել են, ուրեմն ամեն ինչ նորմալ է»:
Այն հարցին, թե դա փոքր ծախս է, դրա համա՞ր նշանակություն չեն տալիս, նախարարը նշեց. «1 տրիլիոն 680 միլիարդ դրամի մեջ 5 միլիոնը մանր ծախս է, բայց մեծ ու փոքրի տեսակետից ամեն մեկ դրամն էլ կարեւոր է, քանի որ ամեն մեկ դրամին էլ ենթադրում է, որ առավելագույն արդյունք պետք է ստանալ»:
Լուսինե ԲՈՒԴԱՂՅԱՆ
